Lima ka pusher sikop sa managlahing operasyon

CEBU, Philippines — Lima ka pusher ang nadakpan sa managlahing anti-drug operation sa kapolisan sa Mandaue City Police Office (MCPO).

Apil sa nasikop ang 48 anyos nga nakuhaan og armas ug shabu human sa ginukdanay nga gihimo sa kapolisan.

Ang team sa kapolisan sa Presinto 5 nga ubos sa pagpangulo sa ilang hepe nga si Police Captain Ricxmar Von Buletic ang nagpahigayon og buy bust operation sa pusher nga si alyas Miloy, taga Umapad sa maong siyudad.

Atol sa buy bust nakamatikod ang suspetsado nga polis ang iyang gikatransaksiyon hinungdan nga mikaratil kini og dagan.

Sa pagdagan sa suspetsado nadakin-as kini og natumba hinungdan nga nalagpot usab ang gidalang armas nga kalibre 38 nga adunay usa ka buhing bala.

Dali nga gisignit sa kapolisan ang suspetsado ug nakuha usab ang gidala niining gagmay'ng pakete sa gituohang shabu.

Laing naghimo og drug operation sa miaging gabii ang kapolisan sa Presinto 2 sa Barangay Subangdaku.

Nadakpan sa kapolisan ang pusher nga si alyas J. R., 32 anyos nga nagpuyo sa sitio Aroma ug nakuha gikan niini ang pakete sa gituohang shabu.

Samtang sa Presinto 1 sa MCPO ilang gihimo ang buy bust operation sa Mantuyong ug Guizo nga miresulta sa pagkasikop sa tulo ka tawo nga pulos usab nakuhaan og shabu.  MEL BANAT NEWS