Mga polis gipasidunggan sa PRO-7

CEBU, Philippines — Giila sa Regional Director sa Police Regional Office(PRO)-7 Brigadier General Redrico Maranan ang bayanihon ug outstanding operational accomplishments sa pipila ka police personnel atol sa Monday flag raising Ceremony sa Camp Sergio Osmeña Sr., Cebu City.

Highlight sa maong kalihukan ang paghatag og awards sa team nga maoy nihimo sa High-intensity hot pursuit operation batok sa armadong suspetsado sa sitio Boloc-boloc, Barangay Sangat, Lungsod sa San Fernando niadtong Marso 21, 2026.

Ang personnel sa Regional Mobile Force Battalion (RMFB)-7 nagpahigayon og hot pursuit operation subay na sa nahitabong shooting incident sa Barangay Greenhills, Lungsod sa San Fernando diin usa tindero og fruit salad ang biktima.  Ang suspetsado natultolan sa pinuy-anan sa sitio Boloc-boloc, Barangay Sangat, Lungsod sa San Fernando. Atol sa operasyon, ang suspetsado nisukol ug nagdumili magpadakop.

Sila si Police Captain Rodney Bantalo, PMSg Patrocinio B Apura III; PSSg Arniel A Cañamo; PSSg Mark Chester O Mabale; PSSg Raul U Manango; PSSg John Rolan B Mesia; PCpl Jeff Ryle F Bonghanoy; PCpl Reyner M Delposo; ug Pat Dino T Martorillas giawardan og Medalya ng Kadakilaan.

Apil sa giila sa kalihukan ang laing upat ka police personnel gumikan sa ilahang notable operational accomplishments sa field.

Medalya ng Kagalingan usab ang gihatag kang PSSg Mary Rose Libradilla sa Alegria Municipal Police Station sa commendable performance atol sa implementation sa warrant of arrest nga niresulta sa pagkasikop sa Regional Top 5 Most Wanted Person ug Provincial Top 1 Most Wanted Person sa kasong murder.

Susamang award ang gihatag kang PSSg Gemma Flores sa Carmen Municipal Police Station sa malampuson nga pag serve sa search warrant diin nasakmit ang caliber .38 firearm ug nadakpan ang suspect sa Barangay Sac-on, Carmen.

Samtang si PSSg Cheryl Tolorio sa Cebu City Police Office nakadawat og Medalya ng Kasanayan (PNP Efficiency Medal) alang sa vital role isip Investigator-on-Case sa malampuson nga buy-bust operation sa Pardo, Cebu City, diin nakompiskar ang PhP670,000 nga balor sa shabu. Si Patrolwoman Giselle Sheen Radoc sa Carcar City Police Station giawardan og Medalya ng Papuri (PNP Commendation Medal) sa pagpakita og exemplary efficiency ug dedication sa trabaho isip area security atol sa malampuson nga buy-bust operation sa Barangay Poblacion 3, Carcar City.

Samtang si Cebu Police Provincial Office Director Police Colonel Abubakar Mangelen Jr., nibisita usab ni Patrolman Kim Ceniza Villariaza, nga naa sa tambalanan karon human naangol sa operasyon sa Lungsod sa San Fernando. MEL BANAT NEWS