Kalangay sa allowance sa mga scholar gikwestyon

CEBU, Philippines — Nipadayag og kabalaka si Konsehal Pastor “Jun” Alcover Jr. kabahin sa wala pa mapagawas nga mga allowance alang sa mga benepisyaryo sa Cebu City College Scholarship Program sa unang semester sa School Year 2025–2026.

Gusto nga masayran sa konsehal kung nganong adunay kalangay sa pagpagawas sa benepisyo sa mga tinun-an.

Suma pa ni Alcover nga daghang tinun-an sa siyudad ang nagsalig sa suporta sa lokal nga kagamhanan aron makapadayon sa ilang pagtungha ug makatabang sa ilang pamilya nga makalingkawas sa kalisod.

Ubos sa programa, ang mga scholar sa pribadong kolehiyo ug unibersidad makadawat og P10,000 alang sa tuition fee ug dugang P1,000 alang sa school supplies matag semester.

Apan gipahibalo sa CCCSP nga nalangan ang pagpagawas sa allowance tungod sa kakuwang sa pondo sa 2025 ug nauwahi pagsumite sa billing documents sa partner schools nga nahuman lamang niadtong sayong bahin sa Enero 2026.

Gihulagway ni Alcover ang sitwasyon isip “deeply alarming,” ug gipahinumduman ang konseho nga ang edukasyon usa ka katungod nga angay panalipdan sa gobyerno.

Gisaysay ni Alcover nga tungod sa kalangan, daghang mga tinun-an ang napugos nga mangutang, molaktaw og pagkaon, ug adunay uban nga hapit na mohunong sa ilang pag-eskwela.

Dugang pa sa konsehal nga ang iyang buhatan nakadawat og daghang reklamo gikan sa ginikanan ug mga scholar nga nagpakita sa epekto sa problema.

Bisan pa man sa pamahayag sa CCCSP nga nagsugod na ang proseso sa pagrelease gamit ang 2026 budget, giingon ni Alcover nga dili kini makapapas sa kakuwang sa pagplano, pagbudget, ug koordinasyon.

Aron matubag kini, nihangyo si Alcover nga magpahigayon og executive session uban sa mga representante gikan sa opisina sa City Administrator, Mayor’s Office, CCCSP, City Budget Office, ug mga partner schools sama sa University of Cebu ug University of the Visayas.

“Let us stand for our scholars. Let us ensure that no student is left behind because of administrative inefficiency or lack of foresight”, padayag pa ni Alcover.  MEL  BANAT NEWS