“Tara Basa! tutoring program ipadayon sa DSWD
CEBU, Philippines — Ang Department of Social Welfare and Development Field Office sa Central Visayas (DSWD-7) mipirma og kasabotan alang sa pagpadayon og laing tuig sa “Tara, Basa! Tutoring Program” uban sa mga local government units ug sa mga higher education institutions (HEIs).
Sa pamahayag sa DSWD-7, 12, 970 ka mga tinun-an ang target nga makabenipisyo sa maong programa, diin 5, 550 ka mga tinun-an nga maglisod og basa ang tudloan sa 1, 870 ka mga tinun-an sa college nga magsilbi nga tutor ug youth development workers.
Ang TBTP ipatuman sa 12 ka mga LGUS apil na niini ang mga siyudad sa Sugbo, Danao, Lapu-Lapu, Mandaue, City of Naga, Talisay, Toledo ug ang mga lungsod sa Argao, Balamban, Barili, Malabuyoc ug Medellin.
5, 550 usab ka mga ginikanan o guardian ang makabenipisyo sa maong programa pinaagi sa Nanay-Tatay Teacher session aron ma empower ang mga ginikanan ug makakuha og kahanas aron makapadayon pagtudlo sa ilang mga anak kon unsaon pagbasa ngadto sa ilang tagsa tagsa ka panimalay.
Ang mga session ipahigayon sa 262 ka elementary schools sa 12 ka LGUs diin magsugod kini Mayo 4 hangtod Hunyo 4, 2026 o 20 ka adlaw gikan Lunes hangtod Huwebes sulod sa tulo ka oras matag adlaw.
Una nang mitaho ang Second Congressional Committee on Education (Edcom 2) nga daghan sa mga tinun-an hilabina sa elementarya nga anaa sa urban areas sa Sugbo ang dili pa kaayo kahibalo mobasa o ang gitawag nga “struggling readers”.
Ang maong tripartite agreement napirmahan niadtong Marso 17, 2026. (BANAT NEWS)
- Latest
