20 balay nasunog sa Tisa
CEBU, Philippines — Niabot ngadto sa 20 ka panimalay ang naigo sa sunog nga niulbo sa Sitio Filter Site, Barangay Tisa ning Dakbayan sa Sugbo, kagahapon Lunes sa buntag, Marso 23,2026.
Ang sunog naabot og 2nd alarm ug napawong alas-3:40 sa hapon.Giingong nagsugod ni sa balay nga iya ni Decina Pedrosa ug gipuy-an ni Jordan Pedrosa. Walay gikataho nga nakalas apan adunay duha ka mga ginang nga naangol diin usa ka 75-anyos nga nasamad sa ulo ug ang 58-anyos nga napangos ang walang tuhod ug naglisod og ginhawa.
Sa 20 ka panimalay, 15 ang hingpit nga naugdaw samtang lima ang nakan-an sa kalayo. Moabot og 25 ka pamilya o 75 ka individual ang apektado sa maong sunog nga hangtud ning pagbalita padayon pang gisubay sa kabomberohan ang hinungdan. Nagbilin kini og P861,000 nga danyos.
Ang Tisa Barangay Council mag special session sab aron makadeklarar sila og state of calamity para makatabang ngadto sa mga apektado. (BANAT NEWS)
- Latest
