Polis girakrakan sa kaubang polis   

CEBU, Philippines — Naangol ang usa ka polis human gitusak-tusak og bala ang giluwanang pribadong sakyanan samtang kini nag-park sa usa ka pribadong sam-ang sa Barangay Mactan, Lapu-Lapu City kagahapon pasado alas-9 sa buntag, Marso 23, 2026.

 Ang maong 40-anyos nga polis nga nagranggo og Police Master Sergeant nadestino sa Traffic Enforcement Unit sa Lapu-Lapu City Police Office.

Sumala pa sa pasiunang report, kauban ra niyang polis sa TEU nga nagranggo sab og Police Master Sergeant ang niunay pagpusil kaniya kinsa mitahan dayun sa ilang opisina human sa hitabo.

Gikataho nga swerteng nakahapa ang maong polis atol sa pagpamusil maong wala maantimano ug tapsing lang sa ulo ang nahiaguman niini.

Human sa hitabo, nibiya dayon ang suspetsadong polis luwan sa iyang sakyanan ug diretsong nitahan sa TEU office. Ang sakyanan sa suspetsadong poli gi-kordon na karon sa mga imbestigador.

"About sa motive dili pa ta maka comment ana since on going pa ang investigation, so ayha nata makahatag og conclusion pag once mahuman na ang imbestigasyon," sigon ni Police Captain Edcel Petecio, tigpamaba sa Lapu-Lapu City Police Office.

Ang biktimang police gipaubos sa restricted custody sa LCPO samtang ang suspetsado gibalhog na sa prisohan. (BANAT NEWS)