World-class complex plano nga tukoron sa probinsiya sa Sugbo

CEBU, Philippines — Usa ka world-class complex nga mapahigayonan sa nagkadaiyang sports events, ang giplanohan nga tukoron sa 20 ka ektarya nga luna sa Sugbo.

Ang maong plano nakakuha dayon og suporta gikan sa Probinsya sa Sugbo human sa tigom ni Gobernador Pamela Baricuatro uban sa mga opisyal sa Philippine Sports Commission (PSC) ug MTD Philippines, ang developer sa New Clark City sa Tarlac. Atol sa tigom, ang mga representante sa MTD Philippines mipresentar sa konsepto sa giduso nga International Sports Complex, nga gipanglantawan nga magsilbi nga permanente nga training ug competition venue sa mga atleta sa Visayas.

Si Baricuatro, mipadayag og tibuok nga suporta sa maong proyekto ug nagkanayon nga nasubay kini sa tinguha sa iyang administrasyon nga mapahingusgan ang sports development program sa Probinsya sa Sugbo.

Sumala sa Capitol Information Office, ang maong pasilidad magsilbi nga lugar o training ground sa mga regional ug national athletes, ubos sa supervision sa Visayas Sports Academy.

Gitinguha kini nga matukod sa 20-ka ektarya nga luna ug mosubay sa international standards diin gidesinyo alang sa nagkadaiyang sporting events, sama sa athletics, football, aquatics, beach volleyball, ug uban pa.

Wala pay pinal nga lokasyon kon asa itukod ang maong complex.

Gilaraw usab kini nga mahimong venue sa 2028 Asian Beach Games diin ang Pilipinas ang mo host.

Ang MTD Philippines nagkanayon usab ngadto sa gobernador nga ang maong pasilidad dili lang alang sa sporting event, mahimong dual-purpose ang development niini diin mahimong ibutang dinhi ang Provincial Government Center, usa ka satellite office sa Kapitolyo.

Atol sa tigom, si Dumanjug Mayor Efren “Gungun” Gica nagkanayon, andam siya nga modonar ang LGU og 30 ka ektarya sa Probinsya sa Sugbo kon adto itukod ang maong complex sa ilang lungsod sa Dumanjug. (BANAT NEWS)