Duha ka ex-convicts sikop sa drug bust   

CEBU, Philippines — Nadakpan sa mga operatiba sa Provincial Intelligence Unit/Provincial Drug Enforcement Unit ug Talisay City Police Station Cebu Police Provincial Office(CPPO) ang duha ka ex-convict sa buy-bust operation sa Sta. Lucia Rd. Barangay Bulacao, dakbayan sa Talisay niadtong Huwebes sa gabii, Marso 19, 2026.

Ang mga nadakpan mao si Risty Cabellon Pangatungan alyas Aga, 37, taga Barangay Bulacao, Talisay City, ex-convict ug subject sa buy-bust operation ingon man si Janet Cabellon Cabriana, 59, nagpuyo sa Barangay Bulacao, Talisay City ug usa sab ka ex-convict.

Nasakmitan ang mga suspetsado og 25 grams sa gituohang shabu nga nagkantidad og P170,000.

Sa impormasyon sa kapulisan, ang duha giingong mga notadong drug personalities nga nag-operate sa Talisay City ug mga silingang lugar.

Maka-dispose matod pa ang duha og 40 ngadto sa 50 gramos nga shabu kada semana depende sa demand sa illegal nga drugas.

Giingong ang tinubdan sa illegal nga drugas sa duha, taga diha ra gihapon sa Talisay City nga karon gisubay na sa kapulisan.

Samtang pipila ka oras ang milabay sa samang gabii, mga alas 10:15 sa gabii, nasikop usab ang usa ka 73-anyos nga lola human nakuhaan og gituohang shabu sa Barangay Mabolo, dakbayan sa Sugbo.

Ang nasikop giila nga si Rosa Arrogante Esguerra, residente sa sitio Estacionan sa nahisgutang barangay.

Nadakpan siya atol sa anti-illegal drugs operation nga gihimo sa Mabolo Police Station 4 ug nakuhaan og duha ka gagmayng sachet sa shabu.

Sa interbyu sa XFM Cebu 88.3, giangkon ni Esguerra nga napugos lang siya nga musulod ilegal nga kalihokan tungod sa kakabos.

Bisan pa man nga senior citizen kini, gitanggong gihapon siya sulod sa prisohan sa Mabolo Police Station 4.

Samtang armas ug shabu ang nasakmit sa kapolisan gikan sa High Value Individual (HVI) nga pusher nga nadakpan sa kapolisan sa buy bust operation nga ilang gipahigayon sa Sitio Sun-ok sa Barangay Ibabao, Lungsod sa Cordova alas 9 pasado ang takna sa miaging Huwebes sa gabii

Gipangulohan ni Police Major John Khalev Sanchez, hepe sa kapolisan ang buy bust operation human usab sila makahipos og impormasyon labot sa ilegal nga gihimo sa maong dinakpan sa nahisgotang lugar

Ang nadakpan giila nga mao si alyas Monsoy, 54 anyos nga nagpuyo sa maong dapit Nakuha nga mga ebidensiya gikan sa maong dinakpan ang mga plastic sachet nga gisudlan sa mga ebidensiya apil na ang drug paraphernalia

Nakuhaan sab siya og kalibre .357 nga armas nga walay lisensiya. — Romeo D. Marantal Nicholas Jon Malaga ug Romeo T.  Limpangog, IBM BANAT NEWS