Mga nakalapas sa balaod sikop atol sa SACLEO

CEBU, Philippines — Niabot ngadto sa 997 ka tawo nga nakahimo og lain-laing kalapasan ang nadakpan sa atol sa gipahigayong Criminality Law Enforcement Operation (SACLEO) sa Lapu-Lapu City Police Office sukad niatong Marso 9 hangtud sa 15, 2026. Si Police Captain Edcel Petecio, tigpamaba sa LCPO nagkanayon nga sa 12 ka  drug operation 13 ka pusher ang ilang nasikop ug 18.92 gramong shabu nga nagkantidad og P128,656 ang ilang nasakmit. Samtang sa ilang 26 ka operasyon 26 usab ka wanted person apil niini ang upat ka most wanted person.

Sa gipatuman nga lokal ordinance sa siyudad niabot sa 645 ka mga drayber nga nakahimo og kalapasan sa trapiko ang ilang nasikop, 148 ang nadakpan sa akto nga nag -inom diha sa pampublikong lugar, 91 ang nadakpan nga nanigarilyo sa pampublikong lugar ug 74 ka tawo ang naaktohan nga nigawas sa ilang balay nga naghukas sa sinina.

Sa laing bahin, nadakpan atol sa managlahing buy-bust operation sa kapolisan sa Lungsod sa Cordova ang duha ka suspetsado drug pusher.

Ang buy-bust operation gipahigayon diha sa Barangay Catarman ug Poblacion diin nasikop si alyas “Jimboy”, 41 ug alyas “Usoy”, 37, nagpuyo sa maong mga dapit.

Nasakmit sa mga polis gikan sa mga suspetsado ang mga paketeng shabu ug drug paraphernalia.. Laing nadakpan mao si alyas “Boni”, 29, taga Pilipog sa mao gihapong lungsod. Samtang, kaluha nga giingong drug addict ang nagsunod nga nadakpan sa kapolisan sa Dakbayan sa Talisay diha Barangay Tanke niadtong Martes sa gabii. Unang nasikop mao si alyas “Ruel”, 52-anyos diha sa Sitio Sambagan mga alas 7:45 sa gabii. Ang kapolisan nihimo og pagpatrolya sa lugar ug nakit-an ang suspetsado nga wala mahimutang sa paglihok-lihok. Nasakmit sa mga polis gikan sa suspetsado ang nibalor nga P680 nga gituohan nga para iyang konsumo. Mga alas 9:10 sa gabii, nisulod ang operatiba sa Sitio Kilawan ug diin ilaha usab nga naabtan si alyas “Noel”, 52. Nakuhaan usab kini og shabu nga nibalor usab og P680.  Sa laing bahin usab, si Police Colonel Abubakar Mangelen Jr., direktor sa Cebu Police Provincial Office nagkanayon nga gikan sa Marso 9 hangtud sa 15, 2026 sa kampaniya batok sa ilegal nga drugas nakapahigayon sila og 43 ka operasyon diin 57 ka indibidwal ang ilang nasikop ug 100.44 gramong shabu ug 3.25 gramong pinaugang dahon sa marijuana nga nagkantidad tanan og P683,382 ang ilang nasakmit. Naka-file usab ang CPPO og 96 ka kaso ngadto sa korte subay sa maong operasyon. Samtang ang sustained manhunt operation batok wanted person 54 ka warrants of arrest ang ilang na-serve ubos sa 51 ka police operations diin 50 ka indibidwal ang nadakpan apil ang unom ka most wanted persons ug 44 ka other wanted persons.  Ang operasyon batok sa illegal possession of firearms nakatala og 13 ka operasyon ug upat ka tawo ang nasikop, lima ka armas ug usab ka explosive ang nakompiska. Samtang pito ka armas ang boluntaryong gisurender ug lima ka kaso ang na-file. Duha ka operasyon sa Oplan Katok ang napahigayon sa CPPO.  Sa kampaniya batok illegal gambling, 13 ka operasyon ang napahigayon diin 19 ka indibidwal ang nasikop ug kapin sa P3,000 nga gambling money ug 13 ka kaso ang nasang-at. — Decemay P. Padilla, Gabriel C. Bonjoc (BANAT NEWS)