Libreng Sakay gilusad sa Cebu City

CEBU, Philippines — Gisugdan na niadtong Lunes, Marso 16, 2026 ang pagpadagan sa upat ka mga bus aron nga libreng magpasakay og mga pasahero sa Dakbayan sa Sugbo isip tubag sa lokal nga kagamhanan sa pagsaka sa presyo sa krudo ug kakuwang sa pampublikong transportasyon.

Gipahibalo ni Mayor Nestor Archival nga tumong sa programa ang pagtabang sa mga trabahante ug estudyante nga naglisod sa pangita og kasakyan tungod sa pag-usbaw sa plitehan ug aduna nay mga pampublikong sakyanan nga limitado nang mobiyahe tungod sa kamahal sa presyo sa krudo.

Ang libreng sakay  himuon gikan Lunes hangtod Biyernes nga manukad gikan sa Cebu City Hall matag alas 5:00 sa hapon.

Sakop sa maong programa ang mga dagkong ruta nga nagkonektar sa amihanan ug habagatan nga bahin sa siyudad padulong sa downtown area, ug vice versa. Ang unang ruta paingon sa amihanang bahin mao ang City Hall – Jakosalem – dalan Imus – General Maxilom – Ayala/PAG-IBIG ug BanTal Road ug pabalik paingon sa City Hall. Ang ikaduhang ruta mao ang City Hall – Osmeña Boulevard – Escario – JY Square, ug TESDA ug pabalik paingon sa City Hall.

Samtang, ang ruta paingon sa habagatang bahin mao ang City Hall – Colon – EMall – N. Bacalso Avenue ug paingon na sa Bulacao ug pabalik sa City Hall. Ang ikaduhang ruta sa habagatan mao ang City Hall – Osmeña Boulevard – Capitol – Petron sa Guadalupe ug pabalik sa City Hall.

Si Archival nagkanayon nga gilangkuban sa mga importanteng dalan ang napili nga mga ruta kun diin mao kini ang nagkonektar sa mga residential area paingon ngadto sa komersyal ug transport hubs sa downtown kun diin mas sayon ang pag-access sa transportasyon ilabi na inig human sa oras sa trabaho ug klase.

Sa pagkakaron, wala pa mipahibalo sa kagamhanan kung hangtod kanus-a ang pagpahigayon sa libreng sakay apan ang maong inisyatiba kabahin gihapon sa padayon nga paningkamot sa kagamhanan sa paghatag og kasaligan nga serbisyo publiko ug pagtabang sa adlaw-adlaw nga biyahe sa mga lumulupyo sa syudad. IBM BANAT NEWS