LTO-7 director, enforcers giilisan

CEBU, Philippines — Tungod sa mga reklamo nga kurapsyon ug pagpangabusar, nagpatuman ang Land Transportation Office (LTO) og lapad nga lahugay sa LTO-7  samtang gipaubos sa imbestigasyon ang mga sakop niini nga gipangreklamo.

Apil sa gihulipan ang bag-o palang nilingkod nga regional director ug gibalhin kini ngadto sa Luzon. Si Atty. Wendel Dinglasan gikan sa LTO Traffic Adjudication Service sa Quezon City maoy nipuli kaniya.

Samtang 13 ka mga traffic enforcers ug pipila ka opisyal ang gitangtang ug giimbestigahan tungod sa kurapsyon ug mga iregularidad subay sa direktiba gikan mismo kang Department of Transportation (DOTr) Secretary Giovanni Lopez.  Duna pay laing lima nga mga bag-o pang na-hire niadtong Enero ning tuiga  ang gipanid-an. “Natanggal talaga. Yung original na enforcers ng LTO, may natira lang sa kanila na lima,” matud pang LTO Chief Assistant Secretary Markus Lacanilao kagahapon.

Apil sa gisusi sa imbestigasyon ang matud pa pagmagahi nila sa pagsunod sa mga instructions sa LTO bahin sa enforcement operation nga ilang gihimo niadtong Marso 10.

Wala sab gibutyag kun apil sa mga reklamo batok sa mga enforcer konektado ba sa ilang operasyon batok modified mufflers nga diin daghan ang nangreklamong motorista. Sa press conference kagahapon, Lunes,  si Lacanilao mibutyag nga daghang mga reklamo bahin sa pagpangurakot sa pipila ka mga kawani ug opisyales sa LTO-7 mao nga miinterbinir na ang ilang ulohang buhatan.

“Hindi kasi pupwedeng magtanggal ka lang ng head o sumunod sa kanya. Kundi tingnan din yung buong personnel kung kailangan. Kasi number one dito, yung serbisyo eh,” pagpasabot pa ni Lacanilao.

Matud pa niya kadtong mga karaan ng mga traffic enforcers nga wala mopaubos sa reshuffling nasuhito na sa operasyon dinhi nga matud pa niya maoy nakapagara nila para mangurakot.

“Ang tagal na nila dito, so may familiarity na sila doon sa baba. Dyan na pumapasok yung corruption, kotong. So kami, wipe out lahat. Palit ng bago,” matud pa niya.

Matud pa niya kaning lahugay kinahanglang buhaton dinhi tungod sa kadaghan sa mga reklamo ilabi na dinhi sa Cebu. Apan iyang gipahibalo daan nga ilaha sab unya kining buhaton sa uban pang mga rehiyon nga dunay daghang nangkrelamo.

Sulod sa duha ka semana, maghimo sila og assessment ug review sa mga personnel records, performances, ug hasta kadtong dunay mga rekord nga sila gireklamo para ilang iduso ngadto sa DOTr. “Kapag po may involved po sa corruption, syempre kaso po yan sa Ombudsman. At may admin case din po sa amin sa LTO,” matud pa niya.

Gipasabot hinuon ni Lacanilao nga taas pa ang proseso sa pagpasaka og kaso batok sa mga gipangreklamong personnel apan iyang giklaro nga para ni masiguro nga lig-on ang kasong ipasaka batok kanila.

Giklaro sab niya nga dili lang enforcement personnel kondili apil tanang posisyon sa regional office apil mga direktor sa ilang imbestigahon aron ipakita sa publiko nga seryoso ang LTO. “Ang number one kasi namin dito is malinis natin at tsaka yung maayos na serbisyo sa mga taga Cebu, taga Region 7,” dugang pang Lacanilao.

Sa pikas bahin, si Dinglasan miawhag sa mga motorista nga dili angay mahadlok kung sila parahon.  Wala sab sila maapektahi kun dili suhito sa Sugbu ang 35 ka enforcers gikan sa kaulohan nga idestino dinhi tungod kay duna nay nag-una nilang intelligence unit nga motabang. “Despite po yung non-familiarity natin, yung intel po yung makakapag-help sa atin para makapag-enforce,” matud niya.

Mipasabot sab siya nga magpadayun ang operasyon batok modified mufflers ug ang pagpakuha sa mga license plates. Mibahad sab si Lancanilao batok aning mga hubog nga mag-drive og sakyanan o motor nga maoy hinungdan sa daghang aksidente.

"Talagang babaliktarin ko itong buong Cebu para mahuli yung mga nagdadrunk driving na yan,” matud niya dungan sa pagpasidaan sa mga drayber nga dili suwayan og hagit ang mga enforcers karon tungod kay di ni sila madala og hangyo o hulga. Apan iyang giklaro nga dili angay kahadlokan ang LTO kay dili na kini parehas kaniadto.

“Kaya sa mga kababayan natin, wag silang matatakot sa LTO kasi hindi na kami kagaya nung dati na akala nila na ginigipit sila.”—Lynda Katherine B. Mecaros  (BANAT NEWS)