Sobra P6M shabu nasakmit, lima nasikop
CEBU, Philippines — Lima ka high value targets ang nadakpan sa PDEA-7 ug PNP sa duha ka managlahi nga anti-illegal drug operations sa Mandaue City ug Talisay City niadtong Marso 13, 2026.
Alas 5:20 sa hapon niadtong Biyernes, ang mga operatiba sa PDEA Mandaue City Team, PDEA-7 Intelligence Section-Intelligence Operation Unit ug Mandaue City Police Office-City Intelligence Unit nihimo og buy-bust operation sa F. F. Cruz Street, Barangay Subangdaku, Mandaue City diin duha ka HVI ang nadakpan.
Si PDEA 7 Regional Director Joel B. Plaza miila sa mga nadakpan nga sila si alyas Saac, 23, taga Barangay Ermita ug subject sa operasyon ug si alyas Rogen, 18, taga Barangay Suba, parehong mga estambay.
Walo ka putos nga gituohang shabu nga 750 grams ug nagkantidad og P5.1 million, buy-bust money, digital weighing scale, duha ka cellular phones, usa ka motorsiklo ug non-drug evidence ang ilang nasakmit.
Samtang pasado alas 6 sa gabii, sa Sitio Abalo, Barangay Cansojong, Talisay City ang mga operatiba sa PDEA Cebu Provincial Office ug Talisay City Police Station nihimo og buy-bust operation sa usa ka drug den. Nadakpan sa operasyon ang drug den maintainer nga si alyas Bernie, 64, ug duha ka drug den visitor nga sila si alyas Raul, 62, ug alyas Marvin, 30, parehong construction workers.
Upat ka putos sa gituohang shabu nga 11.02 grams ug nagkantidad og kapin P74,000, mga drug paraphernail ug buy-bust money ang nasakmit.
Sa laing operasyon, nadakpan sab sa Abellana Police Station 2 Cebu City Police Office(CCPO) ang usa ka HVI sa buy-bust operation sa Sitio San Roque, Barangay Sambag 1, Siyudad sa Sugbo sa miaging adlaw.
Ang nadakpan mao si alyas Jay, 23, residente sa naasoy nga dapit nga nakuhaan og 160 grams nga gituohang shabu nga nagkantidad og kapin sa P1 million. Ang suspetsado bag-o pang nisulod sa pagpamaligya og ilegal nga drugas. Base sa ilang nakuhang impormasyon nagsugod sa wala pa ang Sinulog Festival 2026.
Cash-to-cash basis ang operasyon niini ug giingong maka dispose kini og 200 grams nga shabu kada semana. (BANAT NEWS)
- Latest
