Nisuway pangdagit nadakpan

CEBU, Philippines — Gidakop ang usa ka 34 anyos nga lalake human matud pa misuway og dagit sa usa ka menor de edad nga babaye diha sa Proper, Bateria, Lungsod sa Daanbantayan niadtong Huwebes sa buntag, Marso 12, 2026.

Ang suspetsado mao si alyas Lolong, 34s, taga Villa Casita, La Paz, Bogo City samtang ang biktima wala nganli sa kapulisan alang sa proteksyon niini.

Sa impormasyon sa Daanbantayan Municipal Police Station ang giingong suway nga pagdagit sa biktima nahitabo niadtong Miyerkules , Marso 11, 2026.

Ang insidente nakuha sa CCTV camera, gi-upload sa social media ug ni-viral hinungdan nga giaksyunan dayon kini sa kapulisan sa lungsod.

Sa impormasyon sa otoridad nagkurog matod pa ang biktima nga nisaysay ngadto nila bahin sa hitabo.

Sigon pa sa biktima ngadto sa kapulisan nag-inusara siya nga naglakaw sa National Highway gikan sa ilahang panimalay sa Bateria paingon sa Bateria National High School giduol siya usa ka lalake nga naka Honda Click motorcycle ug naka full-face helmet.

Gihunongan siya niini ug pugsanong mipa-angkas niya sa iyahang motorsiklo.  Wala mosugot ang biktima kay wala siya makaila apan giingong gihulga kay gihunatan siya og kutsilyo nga gisuksok sa hawak niini.

Sa kahadlok nga dunggabon napugos ang biktima sa pag-angkas ug gidala siya paingon sa Bogo City.

Apan pag-abot sa atubangan sa public cemetery niaksyon og barog sa likod sa motorsiklo ang biktima ug nagpakaaron ingnon nga gisangpit niya ang  naagiang magtiayon nga mao ang iyang mga ginikanan.

Pagkadungog sa suspek , dali kining nihunong ug gipakanaog ang biktima ug mipasutoy og padagan palayo.

Nasayran nga ang suspek nadakpan ra sab dayun sa mga barangay tanod ug gi-turnover na ngadto sa kapolisan.  IBM BANAT NEWS