CBRT nag-operate na

CEBU, Philippines — Opisyal nang gilusad ang partial nga operasyon sa Cebu Bus Rapid Transit (CBRT) kagahapon, Marso 13, 2026 ug giablian ang Package 1 aron maagian sa 17 ka mga CiBus.

Ang pagbukas sa CBRT nagtimaan nga usa ka dakong lakang aron nga masugdan na ang pag-alibyo sa problema sa bagang duot sa dagan sa trapiko ug aron nga mapalambo  pampublikong transportasyon sa siyudad.

Sa paglusad sa CBRT, gisugdan ang unang ruta nga adunay gilay-on nga 22.5 nga kilometro nga manukad sa Il Corso sa South Road Properties ug magdagan kini agi sa Mambaling, ug gamiton na ang dedicated lane sa Natalio Bacalso Avenue ug Osmeña Boulevard ug moagi sa dalan Escario ug lahus na sa Cebu I.T. Park sa Barangay Apas.

Si Konsehal Winston Pepito kinsa tsirman sa Committee on Transportation sa konseho sa dakbayan, misalmot sa unang pagdagan sa bus nga moagi sa maong ruta gikan sa SRP paingon sa I.T. Park aron personal nga masinati kung unsa kamahinungdanon ang CBRT sa mga Sugbuanon.

Gihulagway ni Pepito nga hamugaway ug paspas ang iyang nasinati sa maong byahe.  “I would say nga it was a smooth ride. Wala ra kaayo ta na-traffic og maayo,” suma pa ni Pepito.

Base sa nahitabong unang operasyon, ang mga bus mohunong lamang sa mga opisyal nga CBRT station ug hatagan og 30 ka segundo alang sa pagpasakay ug pagpakanaog sa mga pasahero.  Gipatuman ang maong sistema aron mas paspas ang dagan sa biyahe kung itandi sa tradisyonal nga transportasyon.

Gawas sa mga dedicated lanes, ang mga bus mohunong lamang sa mga klarong gimarkahan nga bus stops nga anaa sa gawas sa Cebu South Bus Terminal ug duol sa Fuente Osmeña Circle.

Gipasabot ni Pepito nga dili mahimo nga mohunong bisan asa sama sa kasagarang gibuhat sa mga tradisyonal nga jeepney nga makasakay ug makapanaog og pasahero bisan asa sa dalan.

Kini aron nga mapugngan ang paghuot sa dagan sa trapiko ug dili kini malangay sa pag-abot sa destinasyon ilabi na sa mga pasahero nga nagdali.

Dugang pa ni Pepito nga kinahanglan nga pangusgan ang information drive sa sistema sa CBRT aron walay pasahero nga malapas sa iyang destinasyon.

Sa paglusad sa CBRT, nitanyag kini og libreng sakay ubos sa programa sa Department of Transportation.

Giklaro ni Pepito nga libre ang plete sa mga pasahero gikan alas 5 sa buntag hangtod alas 8 sa buntag. Human niining mga orasa, magsugod na ang pagpaningil sa regular nga plete. Ang paglusad sa CBRT gilauman nga makatabang sa pagpauswag sa sistema sa transportasyon sa siyudad alang sa mas organisado, paspas, ug komportable nga biyahe alang sa mga pasaherong Sugbuanon.

Gipaningkamutan sab karon sa buhatan ni Pepito nga makig-alayon sa mga nasudnong ahensya ug buot sab niini nga personal nga makahinabi si Presidente Ferdinand Marcos Jr. aron nga mahatagan og prayoridad ang paghuman sa CBRT ilabi na sa Package 2 ug Package 3 nga kapin usa ka dekada nang natanggong.  Malaumon si Pepito nga mahitabo ang gidamgo sa mga Sugbuanon nga mapatuman ang operasyon sa orihinal nga ruta nga manukad sa Barangay Bulacao paingon sa Barangay Talamban. IBM  BANAT NEWS