PNP nagbantay vs petroleum hoarding   

CEBU, Philippines — Gimando ni Jose Melencio Nartatez Jr., hepe sa Philippine National Police (PNP), niadtong Lunes, Marso 9, 2026, ang tanang police units sa tibuok nasod nga apilon sa ilang routine patrols ang mga gasolinahan aron mapugngan ang oil price manipulation ug hoarding samtang nagpadayon ang krisis sa suplay sa lana tungod sa tensiyon sa Middle East.

Ang lakang gihimo human mangayo og tabang ang Department of Energy (DOE) sa PNP aron motabang sa pagmonitor sa presyo sa gasolina ug uban pang produktong petrolyo.

Nagtukod ang PNP og coordination protocol uban sa DOE aron masubay ang fuel prices ug matubag ang mga reklamo sa mga motorista kung sa ilang tan-aw nagpaburot sa presyo ang mga gasolinahan.

Gitambagan sa PNP ang mga tag-iya sa gasolinahan nga mosunod sa oil pricing regulations sa DOE.

Sumala ni Sharon Garin, kalihim sa DOE, adunay mga 14,000 ka gasolinahan sa tibuok nasod nga gikinahanglang bantayan aron malikayan ang posibleng manipulasyon sa presyo.

Una nang nangayo og tabang ang DOE sa PNP aron masubay ang fuel prices sa nasod ug malikayan ang posible nga price manipulation. Sa pagkakaron, gipalihok na ang mga intelligence operatives pagsubay sa mga depot ug mga bodega nga diin posibleng nanago og petrolyo para ibaligya sa mas mahal nga presyo.

Nakig alayon na sab sila sa Department of Trade and Industry ug sa mga local government units aron mag on the spot checks sa mga gasolinahan.

Kagahapon, aduna nay gasolinahan sa Sugbu ang nipasaka na og presyo kada litro nga niabot og P72.

Si Claire Castro, Palace Press Officer Undersecretary miingon nga 54 ka gasoline stations ang gipadad-an og show cause orders sa DOE tungod kay sayo kaayo silang nipasaka sa ilang presyo nga giisip nga usa ka pagpamintaha. (BANAT NEWS)