Kapolisan misaulog sa Women`s Month

CEBU, Philippines — Gipakita sa mga babaye'ng police ang ilang kaisog ug katakos pagresponde sa delikadong mga alarma sama sa usa ka bomba. Gamit ang ilang long ug short firearms ug naka full battle gear, mainampingon ang paglihok sa mga babaye'ng police nga sakop sa 1st ug 2nd Provincial Mobile Force Company Cebu Police Provincial Office(CPPO) sa usa bomb alarm.

Hangtod nakuha ug gi-detonate sa kapolisan ang bomba ug usa ka sakop nila ang naangol ug daling gi-rescue ug gidala sa medical facility.  Usa lang kini sa demontrasyon nga nagpakita kun unsay mahimo sa lalaki mahimo usab sa babaye nga anaa sa law enforcement agencies.

Kabahin kini sa Women's Month celebration sa CPPO nga gitambungan sa babaye'ng Gobernadora sa Probinsiya sa Sugbo Pamela Baricuatro.

Una niini, gipahigayon ang paghatag og pasidungog sa mga babaye dili lang gikan sa han-ay sa kapolisan apan apil sab ang katambayayong sa Barangay o kining Barangay Peacekeeping Action Team(BPAT).

Human sa awarding gipahigayon ang pass in review sa mga babaye nga tigpatuman sa balaod.

Sa mensahe ni Governor Baricuatro gipasalamatan niini ang natampo sa women sector sa nation building ug gidasig nga magpadayon sa ilang kawsa.

Misaksi sa kalihukan ang mga opisyales sa CPPO nga gipangulohan ni Police Colonel Abubakar Udang Mangelen Jr., Provincial Director.

Samtang nagsaulog usab ang Cebu City Police Office(CCPO) sa Women's month diin nagkadaiyang kalihukan ang gihimo sa women in uniform. (BANAT NEWS)