Satellite registration gihimo sa Comelec sa lungsod sa Carmen
CEBU, Philippines — Commission on Election sa Lungsod sa Carmen nagpadayon sa ilang gihimo nga satellite registration sa kabarangayan ug tunghaan hangtud nga matapos ang pagpang rehistro karong buwan sa Mayo.
Kini ang gibutyag ni Omar Sharif Mamalinta, ang Election Officer sa nahisgutang lungsod.
Matud pa ni Mamalinta, upat na ka barangay gikan sa 21 ka barangay sa lungsod sa Carmen ang napahigayonan nila og satellite registration.
Ang pagpahigayon sa satellite registration sa barangay nagsugod pa niadtong buwan sa Pebrero human sa mga katalagman nga nitumaw sama sa linog ug bagyo.
Gipadayag ni Mamalinta, malaumon ra hinoon sila nga mapahigayonan ang tanang barangay sa dili pa moabot ang tapos sa pagpang rehistro sa buwan sa Mayo.
Gawas sa kabarangayan aduna usab silay pagpangrehistro sa mga tunghaan diin nagpadayon kini sa pagkakaron. Aduna usab special registration alang sa mga PWD, Senior Citizens ug kabataan.
Sa pagka karon niabot ngadto sa libo kapin ang nakaparehistro sukad kini gibuksan niadtong buwan sa Oktubre sa nilabay nga tuig. — /MEL (BANAT NEWS)
- Latest
