Nagpusil sa babaye nangadakpan

CEBU, Philippines — Nadakpan sa kapulisan sa Argao Municipal Police Station ang duha ka mga suspetsado sa pagpusil patay sa usa ka babaye sa Barangay Langtad, Lungsod sa Argao sa miaging adlaw.

Ang biktima mao si alyas Maria, 39, residente sa naasoy nga dapit. Samtang ang mga suspetsado mao sila si alyas Kirby, 33, taga Barangay Langtad, Argao ug si alyas Eddie, 64, taga Barangay Canbanua-Media, Argao.

Nailhan ang mga suspetsado sa kaipon sa biktima kinsa maoy kauban sa naulahi sa dihang nahitabo ang krimen. Matud pa nga apil sab kini sa gipusil sa mga suspek apan swerteng nakadagan.

Kalambigitan sa illegal nga drugas ang motibo nga gisubay sa kapulisan sa maong krimen sanglit ang biktima matud pa “nagduwa” og illegal nga drugas sa Barangay Langtad. Nadakpan na sab kini kaniadto sa kapulisan sa Lungsod sa Argao ang biktima sa kasong kalapasan sa Republic Act 9165. Nasayran sab nga ang mga suspects giingong mga manuyopay sab diha sa maong barangay. Si alyas Eddie adunay kasong murder kaniadto. Wala hinuon mobutyag ang kapolisan kun unsay motibo sa mga suspek nga patyon ang biktima. — /IBM (BANAT NEWS)