52 balay naugdaw sa sunog

CEBU, Philippines —  Niabot ngadto sa 52 ka mga panimalay ang apektado sa sunog nga niulbo sa may sitio J. Panis, Street Sitio Univille, Barangay Kasambagan ning Dakbayan sa Sugbo, alas -2:04 sa hapon, adlaw nga Sabado Marso 7, 2026.

Ang sunog giingong nagsugod sa panimalay nila ni Romeo Sayson nga gipuy-an ni Rodney Sayson.

Ang alarma naabot sa 4th alarm  tungod sa kainit sa panahon ug kusog nga hangin apan nakontrolar kini alas 3:23 ug hingpit nga napawong alas 4:31 sa hapon.

Ang maong sunog nakaapektar sa 70 ka pamilya o 280 ka tawo. Ang kabomberohan kay padayon pa nihimo sa ilang imbestigasyon human duha ka sunog ang niulbo sa maong dapit apan giingong konektado lang.

Matud pa ni Senior Fire Officer 3 Wendell Villanueva, padayon pa karon ang gihimo nga imbestigasyon may kalabutan sa hinungdan sa pag-ulbo sa sunog.

Gitug-an ni Villanueva, nakatabang usab ang pagdeklarar nila gilayon sa 4th alarm kay daghang mga bombero sa mga silingan nga dakbayan ug lungsod ang niresponde.

Wala hinuoy natala nga nakalas apan adunay duha ang giingong naangol nga gidala sa tambalanan.

Dunay mga residente sa dapit nga wala gyuy nabitbit nga mga gamit tungod sa kapaspas ug kadali sa pagkatap sa kalayo.

Usa ka Flor Sayson, 64,  nibutyag nga nanglimpyo siya atong higayona kalit lang adunay kusog kaayo nga buto nga gituohan nilang gikan sa transformer sa poste kay gikan man sa ibabaw.

Apan miingon sab siya nga  nisunod  dayun ani ang kalayo ug sa pagsulod niya sa ilaha nakita niya ilang floormat sa ibabaw nga bahin sa balay ug sa mga plywood nga karaan nga nagkayo na.

Mibutyag sab siya nga posibleng sa kainit maoy hinungdan sa pagbuto sa gas range nga nakapaso sa iyang anak nga nagluto ug itlog atong panahona.

Ang iyang pamahayag wala pa gikompirmar sa kabomberohan atol ning pagsuwat sa balita tungod padayun pa sila sa ilang imbestigasyon.

Sumala pa sa BFP nagbilin og danyos nga P3.9 milyones ang maong insidente.

Samtang ang Department ot Social Welfare and Services ang padayon pa nanguha sa mga impormasyon sa mga nasunogan alang sa paghatag kanila og dinaliang ayuda gikan sa siyudad.