Upat nga nang-refill og LPG sa

CEBU Philippines —  Gironda sa kapulisan sa San Fernando Police Station ang usa ka tindahan nga giingong gihimong illegal refilling station ug namaligya sab kini og LPG nga gisulod sa mga butane canisters nga wala'y pagtugot sa otoridad diha sa Barangay Tonggo, Lungsod sa San Fernando niadtong Biyernes sa hapon, Marso 6, 2026.

Ang maong operasyon niresulta sa pagkasikop sa upat ka mga indibidwal nga sa si alyas Angel, 33 anyos, taga Barangay Anislag, Lungsod sa Pinamungajan; alyas Brian, 18 anyos, taga Toledo City; alyas Flaviano, 65 anyos, residente sa Toledo City ug alyas Henry, 20 anyos, molopyo sa Toledo City.

Ang kapulisan sa Lungsod sa San Fernando nakadawat og report bahin sa illegal refilling station sa lugar maong nilusad sila og buy-bust operation.

Matud pa nakig-transakisyon kanila ang usa sa mga suspek nga si alyas Angel ug sa dihang nahitabo ang pagpalit gidiretso siya og sikop.

Wala silay napresentar nga mga permits o lisensiya ilabi na gikan sa Department of Energy nga maka-refill ug mamaligya og LPG.

Ang pag-refill og LPG sa mga basiyo sa butance canisters higpit nga gidili tungod sa kapeligro niining mobuto. Mao kini ang nahimong hinungdan sa pipila ka mga insidente sa sunog sa nanglabay nga mga katuigan. Ang mga dinakpan mag-atubang og kasong kalapasan sa Republic Act 11592.