Mga lider sa fraternity gitapok sa siyudad sa Mandaue

CEBU, Philippines —  Gitigum sa kagamhanan sa siyudad sa Mandaue ang nagkadaiyang lider sa fraternity sa tuyo nga kahatagan og sulbad ang problema sa bandalismo sa dakbayan.

Sila si Mandaue City Administrator Atty Gonzalo "Sally" Malig-on ug Mandaue City Executive Secretary Riczen Gingoyon maoy nangulo sa maong pakigtigum.

Lakip sa mitambong ang kadagkoan sa Mandaue City Police Office (MCPO) nga gipangulohan ni City Director Police Colonel Cirilo Acosta Jr.

Gihangyo nila ni Atty Malig-on ug Atty Gingoyon ang mga lider sa frat nga mahimong hapsay ug limpiyo ang siyudad nunot usab sa ipatuman nga beautification program nga gitinguha ni Mandaue City Mayor Thadeo Jovito "Jonkie" Ouano.

Si Acosta mihangyo usab sa pagtinabangay sa gitinguhang kahapsay ug kamalinawon sa dakbayan.

Sa maong tigom ilang nasabutan ang pagbutang og graphite wall aron adto isuwat sa nagkadaiyang grupo ang bisan unsang mahan-ay sa ilang hunahuna.

Una niini namatikdan ang nagkagrabeng problema sa bandalismo diin ang mga bongbong o koral nga semento napuno na sa mga gisuwatsuwat nga nakahatag og kahugaw sa talan-awon sa palibot.

Ang pagpatahom sa palibot sa siyudad sa Mandaue maisip usab nga kabahin sa mga pagpangandam sa Asean Summit nga pagahimoon dinhi sa Sugbo.