Cebu City mohingusog sa solid waste segregation policy

CEBU, Philippines — Pahingusgan ni Konsehal David “Dave” Tumulak ang pagpatuman sa waste segregation policy nga gipatuman ni Cebu City Mayor Nestor Archival, Sr. tungod kay kong mosaka ang presyo sa krudo mapugos ang siyudad sa pagpasaka sa budget alang sa subsidy sa krudo sa mga garbage trucks nga mopaingon sa landfill sa Lungsod sa Aloguinsan.

Si Tumulak nagkanayon nga kinahanglan ang kooperasyon sa publiko aron makatabang sa siyudad ilabi na nga nag-atubang kini sa krisis sa basura diin dili lang ang siyudad ang apektado lakip usab ang kasikbit nga mga lungsod kinsa apektado sa pagsira sa Binaliw landfill.

Matud ni Tumulak nga adunay mga batakang programa ang maapektohan kong magpadayon ang gidaghanon sa basura ug kong mosaka na ang presyo sa krudo human sa kagubot nga nahitabo sa Middle East.

Samtang si Archival nipahibalo nga anaa sa P500 milyones ang gigahin sa siyudad alang sa gastohan sa tinuig nga basura sa siyudad apan tungod sa kagubot sa laing nasud ug sa dakong gastohan sa paghakot sa basura paingon sa laing munisipalidad posibleng moabot kini ngadto sa P2 bilyones.

Ug gumikan niini, mapugos usab ang konseho sa pagtuki mahitungod sa posibilidad sa pag-aproba og supplemental budget ug adunay mga programa nga posibleng matangtang.

Si Tumulak nipasalig nga moagi pa usab kini og tukmang proseso sa paghukom sa pagpagawas sa pundo apan kinahanglan nga dali nga matubag sa siyudad ang problema sa basura aron malikayan ang pagkahurot sa pundo sa kagamhanan. BDB BANAT NEWS