Ethics complaint batok ni Rep. Suntay giduso

CEBU, Philippines — Gi-refer sa House Committee on Ethics and Privileges ang mga pamahayag ni Bong Suntay, kongresista sa ika-upat nga distrito sa Quezon City, human sa iyang law-ay nga komento bahin sa aktres nga si Anne Curtis.

Ang pamahayag ni Suntay iyang giluwatan atol sa hearing sa House Committee on Justice niadtong Marso 3 nga may kalabotan sa impeachment complaints batok kang Sara Duterte.

Ang mosyon sa pagrefer sa kaso gisang-at ni Ann Matibag, chairperson sa House Committee on Women and Gender Equality.

Sumala sa report sa News5, usa usab ka ethics complaint ang gisumite niadtong Huwebes, Marso 5, batok sa kongresista.

Ang reklamo gisang-at sa mga women’s rights advocates uban sa tabang ni Sarah Elago, representante sa Gabriela Women’s Party.

Nahitabo ang kontrobersiya samtang gihisgutan sa komite ang mga reklamo sa impeachment batok kang Duterte. Sa iyang pagpaningkamot nga ipakita nga ang pipila ka nangaging pamahayag sa bise presidente batok kang President Ferdinand “Bongbong”” Marcos Jr. bunga lamang sa imahinasyon.

Naghatag og pananglitan si Suntay nga naglangkob sa personal niyang hunahuna bahin sa aktres. “Minsan nasa Shangri-La ako, nakita ko si Anne Curtis. Ang ganda-ganda pala niya. You know, may desire sa loob ko na nag-init talaga. Na-imagine ko na lang kung ano’ng pwedeng mangyari, pero siyempre hanggang imagination lang ’yon.” Matod ni Suntay.

“Hindi naman siguro ako pwedeng kasuhan dahil kung ano na-imagine ko, eh.” dugang niini.

Human sa kusog nga reaksyon gikan sa publiko ug sa grupo sa kababayen-an, gipatin-aw ni Suntay sa sunod nga mga interbyu nga ang iyang giingon usa lamang ka analogy ug gituyo niyang ipakita nga ang pag-imagine sa usa ka sitwasyon dili pareho sa tinuod nga panghitabo.

“Sinabi ko ang ganda-ganda niya. And I think she should take it as a compliment that I feel and I believe that she’s very beautiful,” matod pa ni Suntay sa interbyu uban sa One News anchor Ed Lingao ug journalist Manuel Mogato.

Ang House Committee on Ethics and Privileges maoy modesisyon kon adunay paglapas sa ethical standards sa Kamara ang mga pamahayag sa kongresista ug kon unsa ang posibleng aksyon nga ipatuman. MEL BANAT NEWS