P66.68 bilyones nga dugang PAPs giaprobahan sa PDC
CEBU, Philippines — Giaprobahan sa Cebu Provincial Development Council (PDC) Executive Committee ang dugang Programs, Activities, and Projects (PAPs) sa lima ka national government agencies nga nikabat tanan ngadto sa P66.68 bilyones.
Ang maong pag-aproba nahitabo atol sa PDC executive committee meeting niadtong Marso 2, 2026.
Sa maong kantidad P34.38 bilyones ang gikan sa national program sa Department of Education (DepEd) nga gitawag nga "Advancing Climate-smart, Quality, Inclusive, and Resilient Education (Acquire) nga kinahanglan og endorsement sa tanang PDC sa nasud.
Base sa presentasyon sa DepEd, nagkanayon kini nga ang maong kantidad nga pundohan pinaagi sa loan o utang gikan sa Asian Development Bank (ADB) maoy tubag sa ahensiya sa projected nga 188,000 shortfall o sa semi-skilled worker sa tuig 2035. Gawas sa ADB, ang Acquire nakakuha usab og grant gikan sa International Finance Facility for Education nga nikabat ngadto sa $12.5 milyones (USD), Global Partnership for Education nga nikabat ngadto sa $10 milyones (USD) ngadto sa $12 milyones (USD) ug Education Above all nga mo pundo usab og $10 milyones (USD) ngadto sa $20 milyones (USD).
Gawas sa maong programa sa DepEd, ang Department of Public Works and Highways (DPWH) niduso usab og P31.98 bilyones alang sa 348 nga proyekto niini diin nalakip ang P200 milyones nga seawall ug P200 milyones nga dalan nga adunay slope protection sa Lungsod sa Cordova.
Ang DPWH una nang niduso og P63.54 bilyones nga PAP alang sa 136 nga proyekto niini nga giendorso sa PDC atol sa Pebrero 13, 2026 nga full council meeting.
Dugang giduso nga PAPs mao ang P167.42 milyones sa Department of Science and Technology diin naapil niini ang P15 milyones nga Science Center for Sustainable Development ug sa Department of Environment and Natural Resources - Environmental Management Bureau nga nikabat ngadto sa P150 milyones alang sa Metro Cebu Solid Waste Master Plan Study.
Matud sa Capitol Information Office nga ang Office of the Provincial Prosecutor nihangyo usab og endorsement nga P250,000 nga budget alang sa internet infrastructure, P500,000 nga training sa law enforcement officers ug sakyanan apan ang komitiba gi-refer kini ngadto sa Provincial Peace and Order Council tungod sa dinaliang panginahanglan.
Ang tanang giendorso nga PAPs sa PDC sa Sugbo tukion kini atol sa Regional Development Council (RDC) sa Marso 30, 2026. BDB BANAT NEWS
- Latest















