Edward ligas pasakaan og kasong grave slander

CEBU, Philippines — Girekomendar sa Cebu City Prosecutor’s Office ang pagpasaka og kaso nga grave slander batok sa broadcaster nga si Edward Ligas may kalabutan sa iyang pamahayag atol sa usa ka protesta nga nisaway sa giingong anomaliya sa mga flood control project sa Mandaue City.

Sa Joint Resolution nga gipagawas niadtong Pebrero 13, 2026, si Assistant City Prosecutor Lei Maurae E. Babatuan nakakita og prima facie o igo nga ebidensya nga adunay “reasonable certainty of conviction” alang sa grave slander.

Apan, girekomendar usab sa piskalya ang pagbasura sa mga reklamo nga slander by deed ug cyber libel tungod sa kakulang sa igong ebidensya.

Ang mga reklamo gisang-at ni Jerome G. Awit, presidente sa ZLREJ Trading and Construction Corporation, may kalabotan sa mga pamahayag ni Ligas atol sa mga protesta niadtong Septiyembre 14 ug 21, 2025, ingon man sa usa ka Facebook post niadtong Septiyembre 22, 2025.

Sumala ni Awit, giakusahan siya ni Ligas sa publiko nga nalambigit sa “substandard” nga riprap project daplin sa Butuanon River sa Mandaue City ug gitawag siyang korap nga contractor atol sa mga rally sa Plaza Independencia ug Fuente Osmeña Circle.

Ang kontrobersiya nagsugod human mabungkag ang 15-metros nga bahin sa P127-milyon nga riprap project niadtong Oktubre 29, 2024.  Suma pa ni Awit nga ang pagkahugno tungod sa kusog nga ulan dala sa mga bagyong Kristine ug bagyong Leon, base sa report sa Department of Public Works and Highways (DPWH).

Si Ligas, usa ka media practitioner ug convenor sa Panaghiusa sa Yanong Sugbuanon Batok Korupsyon (PAYONG), miingon nga ang iyang mga pamahayag protektado sa katungod sa kagawasan sa pagpadayag ug sakop sa fair comment doctrine sa mga isyung publiko.

Bahin sa rally niadtong Septiyembre 21 sa Fuente Osmeña Circle, nakita sa piskalya nga milapas sa fair criticism ang mga pamahayag ni Ligas atol sa iyang pakigpulong.

Giingong gitawag niya si Awit nga “substandard contractor” ug gisugyot nga siya ug ang uban “nangawat sa kaban sa gobyerno.”

Si Ligas sa iyang bahin miingon nga mopiyansa lamang siya kon adunay warrant of arrest nga ipagawas batok kaniya.

Si Jaime Paglinawan, chairperson sa Bayan Muna-Cebu, ug pipila pa ka mga aktibista una nang giakusahan og paglapas sa Batas Pambansa Blg. 880 o Public Assembly Act of 1985, nga mitumaw gikan sa rally niadtong Septiyembre 5, 2025 sa gawas sa opisina sa DPWH aron manawagan og accountability sa giingong anomalya sa flood control projects.

Dugang pa ni Ligas nga kon makapiyansa na siya, mopasaka usab siya og kaso batok sa reklamante sa usa ka kasong nga walay pyansa. MEL BANAT NEWS