Sunog misugat sa marso Nicholas Jon Malaga
CEBU, Philippines — Di mominos 130 ka mga indibidwal gikan sa 44 ka mga pamilya ang nawad-an og panimalay human sa miulbo ang usa ka sunog sa usa ka residential area sa Sitio Tambis Banawa, Barangay Guadalupe, dakbayan sa Sugbo niadtong Lunes sa hapon, Marso 2—usa ka adlaw human sa pagbukas sa Fire Prevention Month.
Matud sa Cebu City Bureau of Fire Protection (BFP), dili mominos 21 ka mga balay ang gilamoy sa sunog nga nagsugod mga alas 3:15 sa hapon.
Alas 3:21 sa hapon, giisa sa unang alarma ang sunog, ug ikaduha alas 3:25 sa hapon. Gikontrolar dayon kini sa mga awtoridad alas 3:51 sa hapon. ug hingpit nga napalong mga alas 4:03 sa hapon. Dugang pa, usa ka wala mailhi nga indibidwal ang gikataho nga nasamdan human makaangkon og first-degree nga paso. Samtang, walay natala nga namatay sa insidente.
Gikompirmar sa Cebu City BFP nga mokabat ngadto sa PHP 1,350,000 ang balor sa kadaot nga gibilin sa sunog.
Sa pagsuwat ning balita, wala pa matino sa mga otoridad ang hinungdan sa sunog, samtang nagpaabot pa sa imbestigasyon. (BANAT NEWS)
- Latest
