Nasampak sa trak, patay

CEBU, Philippines — Patay ang usa ka 57-anyos nga lalake samtang naangol ang 45-anyos nga babaye iyang angkas sa dihang ang gisakyan nila nga motorsiklo mibangga sa dump truck sa National Highway, Barangay Tungkop, Lungsod sa Minglanilla niadtong Domingo sa kadlawon, Marso 1, 2026.

Ang nakalas mao si Arnulfo Mangyao, nagpuyo sa Barangay Napo, dakbayan sa Carcar samtang ang naangol mao si Cristina Luzon, taga Barangay Dugoan, Lungsod sa Sibonga.

Samtang ang dump truck gimaneho ni Hoener Tapic Abendan, 43 anyos, nagpuyonsa Barangay Tuyan, Dakbayan sa Naga.

Base sa inisiyal nga imbestigasyon sa Minglanilla Municipal Police Station ang motorsiklo ug dump truck parehong nagbiyahe northbound sa national highway diin ang dumptruck nag-una sa motorsiklo.

Nihunong ang dump truck sa intersection aron mo left turn sa Barangay road paingon sa Barangay Tunghaan, Minglanilla.

Apan ang motorsiklo nga naa sa likod wala nakabantay ug diretso kining nasampak sa likod sa maong truck hinungdan nga ang driver ug angkas nalabay sa motorsiklo.

Ang duha ka biktima daling gidala sa tambalanan apan si Mangyao gideklarar nga dead on arrival samtang si Luzon padayong nagpaalim sa tambalanan.

Ang driver sa gikustodiya sa kapulisan , apan matud pa ni Police Lieutenant Colonel Maria Theresa Macatangay, hepe sa Minglanilla Police nga nahinabi sa Banat News pagkahuman sa ilang gihimong imbestigasyon, nigawas nga walay sala ang drayber sa trak.

Ang ilang imbestigasyon nasuportahan sa kuha sa closed-circuit television (CCTV) footage nga nagpakitang dili “criminally liable” si Abendan sa maong insidente. “During sa amoang pag-investigate, wala man siya’y criminal liability. Gi-hold lang siya for the conduct of further investigation,” ingon niya.

Dugang pa, gibutyag usab ni Macatangay nga kusog kaayo ang pagpadagan sa drayber sa motorsiklo hinungdan nga nabangga kini sa likod sa dump truck nga maoy nakaingon sa iyang hinanaling kamatayon.

“Kung dili to kusog (ang padagan), dili to mamatay,” sigon niya.

Matud niya, gisusi sa kapulisan ang drayber sa trak kung aduna ba ni mga criminal records ug gipailalom usab siya sa mga pagsulay sa alkohol ug drugas apan nag negatibo kining tanan.

Sa pagsuwat ning balita, nasayran gikan kang Macatangay nga imbes kasohan og kalapasan sa Reckless Imprudence Resulting in Homicide and Physical Injury with Damage to Property gikatakda nilang buhian si Abendan.

Dugang pa niya nga wala pa matino sa mga kapulisan kung unsay background sa mga biktima ug diin sila gikan sa wala pa ang insidente, lakip na ang ilang relasyon sa duha ug kun hubog ba ang namatay nga drayber sa motorsiklo. — /IBM (BANAT NEWS)