Girelibohan tungod sa traffic?

CEBU, Philippines — “Tungod sa traffic” nga nakatanggong sa Presidential Convoy, girelibohan sa iyang katungdanan isip hepe sa Consolacion Municipal Police Station si Police Lieutenant Colonel Eunil Avergonzado.

Apan samtang gikompirmar sa Cebu Police Provincial Office (CPPO) nga girelibohan ang maong hepe, kini miinsister nga wa ni kalambigitan sa grabeng problema sa trapiko sa maong lungsod atol sa pagbisita ni Presidente Ferdinand "Bongbong" Marcos Jr. sa Sugbo sayo ning semanaha.

Si Police Major Sam Dacullo, information officer sa CPPO nga nahinabi sa Banat News nagkanayon nga si Avergonzado giluwatan og relief order subay sa standard reshuffling sa mga station commanders sa probinsiya.

Hulipan siya ni Police Lieutenant Colonel Verniño Noserale, kinsa hepe sa Naga City Police Station.

Matud ni Dacullo, si Police Regional Office 7 (PRO-7) Director Police Brigadier General Redrico Maranan ang mihimo sa reassignment order nga sugod niadtong Pebrero 26—samang adlaw sa dihang mibisita si Marcos sa processing center sa Department of Social Welfare and Development sa Liloan, silingang lungsod sunod  sa Consolacion.

Apan gihimakak ni Dacullo ang mga taho nga ang pagrelibo kang Avergonzado tungod sa kahuot sa trapiko nga nasinati sa presidential convoy samtang niagi sa Consolacion.

Matud pa niya, natunong lang gyud nga anang adlawa sa iyang relief order naagi sa ilang lungsod ang presidente.

“Dili gyud na mao ang rason nga na-relieve si Avergonzado tungod na-traffic ang pagbisita ni President Bongbong Marcos. Nag-coincide lang ang relieve order nga nag-effect gahapon,” matud ni Dacullo sa pakighinabi sa Banat News niadtong Biyernes sa gabii.

Nasagmuyo siya sa mga tawong nagpakatap og dili mao nga impormasyon diha sa social media nga nakapabati paminawon sa normal nga lahugay sa mga hepe sa police stations ilabi na kadtong nakaserbisyo na og kapin sa usa ka tuig.

Wala hinuon niya gisalindot nga duna gyuy problema sa traffic sa Consolacion kada adlaw ug bisan ang convoy sa presidente nga paingon sa Liloan dili exempted.

Matud niya ang nagkadaghang mga sakyanan ug mga tawong maglabang-labang maoy hinungdan niini.

Si Avergonzado gibutang sa PRO-7 Headquarters apan wala pa matino kon asa siya idestino. IBM BANAT NEWS