3,400 ka security personnel gipakatap sa PRO-7
CEBU, Philippines — Ang Police Regional Office-7 nipakatap sa security forces kini subay sa mando ni PNP Chief Jose Melencio Nartatez, Jr. tungod kay gilaoman nga adunay mga panagtapok nga himuon subay na sa Trillion Peso March nga nadungan usab sa 40th anniversary sa EDSA People Power karong adlawa, Pebrero 25, 2026.
Si Police Brigadier General Redrico Maranan, direktor sa PRO-7 nianunsiyo nga dul-an sa 3,400 ka police personnel ang gipakatap sa tibuok Central Visayas diin na-establisar na ang security coverage sa nagkalain-laing area of convergence, major thoroughfare ug critical infrastructure aron masiguro ang public safety, pagmentinar sa kahapsay ug kalinaw ug suporta sa lawful exercise sa constitutional rights.
Gihingusgan usab ang koordinasyon sa local government units, force multipliers, ug ubang stakeholders aron masiguro ang calibrated ug orderly security posture.
Subay na sa direktiba sa hepe sa Philippine National Police, ang tanang deployed personnel gipahinumduman nga magpabiling professional, neutral, disiplinado ug mopatuman og maximum tolerance, likayan ang unnecessary confrontation ug dili ma-provoke ug giklaro nga ang strength sa police officer masukod sa restraint ug sound judgement ug dili sa pwersa.
Nunot niini, ubos sa full alert status ang kapolisan isip pagpangandam sa 40th anniversary sa EDSA People Power.
Giklaro Police Colonel George Ylanan, officer-in-charge sa Cebu City Police Office nga ipatuman nila ang maximum tolerance diin gihatagan ang mga tawo og katungod nga makapadayag sa ilahang sentimento.
Niawhag si Ylanan ngadto sa mga mohimo og panagtapok nga motuman sa balaod aron malikayan ang kakulian.
Si Ylanan naglaom nga malinawon ang sitwasyon tungod kay dili hilig og kasamok ang raliyista sa Dakbayan sa Sugbo. — /BDB (BANAT NEWS)
- Latest
