Ni-overtake, duha naligsan

CEBU, Philippines — Patay ang duha ka babaye human sila nalatayan og prime mover sa National Highway, Barangay Panalipan, Lungsod sa Catmon pasado alas 6 sa gabii niadtong Sabado, Pebrero 21, 2026.

Ang mga biktima giila nga sila si Jerly Colongon Cagoyong, 33 anyos, maoy nagmaneho sa motorsiklo ug ang iyang angkas nga si Jenifer Luza Damonsong, 50, ang duha pulos taga Barangay Banilad, Mandaue City.

Samtang ang prime mover nga nakaligis sa mga biktima gimaneho ni Mark Absalon, taga Sagay City, Negros Occidental.

Sa imbestigasyon sa Catmon Municipal Police Station parehong og dreksyon ang motorsiklo ug ang maong prime mover padung sa habagatan.

Matud pa nga padulong unta mo-overtake ang motorsiklo sa maong dakong trak apan dunay gikasugat nga laing sakyanan sa pikas nga lane maong nibalik kini sa agi.

Apan nasaghiran sila sa maong prime mover hinungdan nga natumba ug uwahi na ang tanan kay nalatayan silang duha sa ligid.

Gidala pa ang mga biktima sa Juan Dosado Memorial Hospital sa Barangay Dumlog, Lungsod sa Sogod apan gideklarar sila sa dead-on-arrival sa nag-atiman nga doktor.

Samtang ang drayber nga nakaligis nadakpan sa kapulisan sa Carmen Municipal Police Station sa National Highway, Barangay Poblacion, Lungsod sa Carmen.

Gitugyan dayon ang driver ngadto sa kapulisan sa Catmon Municipal Police Station. — /IBM (BANAT NEWS)