Way riders, way namitik sa TCH

CEBU, Philippines — Wala'y nagtapok, namitik ug nag-exhibition sa sikat kaayong Red Cliff diha sa Transcentral Highway niadtong Sabado , Pebrero 21,2026 tungod kay nag-atang ang Regional Highway Patrol Unit(RPHU)-7 didto.

Ang Tactical Motorcycle Riding Unit sa RPHU-7 ug Cebu City Mobile Force Company nipakatap og mga sakop sa maong dapit aron siguraduhon nga luwas ang tanang mga motorista.

Si Police Lieutenant Colonel Wildemar Tiu, Regional Chief sa RHPU-7 miingon tumong sa ilang pag-deploy sa mga personnel aron mabadlong kadtong mga mag-exhibition ug reckless magmaneho og motorsiklo tungod kay delikado ang dalan ug peligro para sa tanan.

Matag adlaw nga Sabado ug Domingo, ang TCH ilabi na diha sa Red Cliff modagsa ang mga motorcycle riders nga mag chill ride gikan sa Cebu City padung sa Balamban ug pabalik.

Apan pipila sa mga riders anha magara-gara ug mag-exhibition sa ilang pagmaneho.

Anha sa Red Cliff sab mag-estambay ang mga photographers nga “mamitik” sa mga riders, mao nga ang uban mogara sa ilang pagmaneho sa maong dapit aron nindot ang ilang hulagway ug kini gikonsiderar sa mga otoridad nga peligroso dili lang sa ubang motorista kondili apil pud sa mismong riders.

Apan walay mga riders nga nisaka sa TCH anang adlawa maong nagduda si Tiu nga dunay nakabantay sa presensiya sa daghang mga polis sa lugar ug gipasa-pasa kini sa mga group chats sa mga motorcycle clubs.

Apan bisan pa niini, upat ka sakyanan ug lima ka motorsiklo nga walay mga papeles sama sa rehistro ang ilang gi-impound anang adlawa.

Ang maong operasyon gihimo sa RHPU-7 human nag-viral ang video sa Superman Rider nga mibangga og laing motorsiklo gumikan sa pag exhibition niini.

Ang maong rider giembargohan na sa Land Transportation Office-7 og lisensiya maong dili na kini makamaneho pa og motor o sakyanan dinhi sa nasud. — /IBM (BANAT NEWS)