Mandaue nagdugang og 40 ka traffic enforcers
CEBU, Philippines — Dugang mga traffic enforcers ang ipangdestino sa kadalanan sa Siyudad sa Mandaue human nakakompleto sa tulo ka adlaw nga training ang dugang 40 ka sakop sa Traffic Enforcement Management of Mandaue (TEAM).
Si Hylle Retuya, pangulo sa TEAM miingon nga importante ang dugang mga traffic enforcers para sa kaluwasan sa mga motorista ug mga pedestrians ug pagsiguro sa hapsay nga dagan sa trapikop sa siyudad.
Nagdugang sila og traffic enforcers aron mabahin-bahin ang oras sa adlaw aron masigurong duna kanunay nga dunay magbantay sa kadalanan.
Gipasabot ni Retuya sab niya nga apil sa ilang bantayan ug buhaton mao ang mga traffic violators aron sila dakpon.
Ang uban nila gidestino sa roving operation nga maoy mag-monitor sa kahimtang sa dagan sa mga sakyanan
Sa pagkakaron ang TEAM adunay 400 ka mga personnel.
E-bikes sa Talisay gi-regulate
Sa pikas bahin sa Dakbayan sa Talisay, moabot sa 2,590 ka mga e-bike drivers ug mga tag-iya ang ipaubos sa road safety seminar sa City of Talisay-Traffic Operation Development Authority (CT-TODA) sugod karong adlawa.
Sa talaan sa CT-TODA, 13 ka barangay sa Talisay ang adunay mga e-bikes nga nagdagan nga mao ang barangay Pooc, Biasong, Poblacion, Dumlog, Cansojong, Tanke, San Roque, Tanke, San Isidro, Bulacao, Lagtang, Tabunok, Mohon ug Lawaan 2.
Sa kinatibuk-an moabot sa 4,686 ka e-bikes ang nagdagan karon sa maong siyudad, apan human giinspeksyon 2,590 lang nakapasar—wala sab ibutyag kun unsay basihan aron matawag nga pasado kini o dili.
Ang 2,422 sa nakapasar gigamit isip pasaherroan samtang ang pribado naa sa 168.
Ang CT-TODA nipahibawo nga kadtong lang mga nakapasar sa inspeksyon ang kinahanglang motambong sa seminar.
Kung mapakyas sa pagtambong, dili sila mahatagan sa rehistrasyon subay sa lagda sa ordinansa sa siyudad. Ang seminar magsugod karong adlawa hangtud na sa petsa 28 sa buwan sa Pebrero. — /IBM (BANAT NEWS)
- Latest















