Mga kaso sa malnutrisyon sa CV nikunhod

CEBU, Philippines — Mikunhod ang malnutrisyon sa mga bata ubos sa lima ka tuig sa Central Visayas, sumala sa resulta sa 2025 Operation Timbang Plus (OPT Plus) nga gipagawas sa Regional Nutrition Committee (RNC).

Bisan pa niini, gipadayag sa komite nga ang stunting, kun wa katubo nga mga bata nagpabilin nga dakong kabalaka sa kahimsog sa publiko sa rehiyon.

Ang datos gikan sa pinakabag-ong monitoring nagpakita og kinatibuk-ang pagkunhod sa malnutrisyon sa nag-unang mga indikator. Ang pagdaghan sa mga underweight nga bata mikunhod sa 2.90 porsyento, samtang ang stunting kun wa katubo, mikunhod sa 6.26 porsyento. Ang kaso sa wasting kun ubos kaayo nga timbang narekord sa 1.08 porsyento, ang overweight ug obesity sa 1.91 porsyento.

Miingon ang RNC nga ang mga numero nagpakita og padayon nga kalamboan kumpara sa miaging mga tuig, nga nagtimaan sa progreso sa pagpatuman sa mga nutrition programs sa tibuok Central Visayas.

Taliwa niini , gi-emphasize sa komite ang panginahanglan sa padayon ug gipahugot nga paningkamot aron mas mapakunhod ang tanang porma sa malnutrisyon, labi na ang chronic undernutrition nga hinungdan sa stunting.

Gipahimangnoan usab sa komite nga ang kawalay datos nga gisumite sa duha ka local government units (LGUs) sa Cebu province posibleng nakaapekto sa pagkakompleto ug kabug-osan sa regional results.

Suma pa niini nga mahinungdanon ang hustong oras ug kompleto nga report gikan sa tanang LGUs aron masiguro ang kasaligan nga assessment ug evidence-based planning.

Ang Operation Timbang Plus usa ka tinuig nga kalihokan nga gihimo sa mga grassroots nutrition workers aron susihon ang nutritional status sa mga bata nga edad 0 hangtod 59 ka bulan.

Gidasig sa RNC ang mga miyembro nga ahensya ug mga LGUs nga gamiton ang resulta sa 2025 OPT Plus aron giya sa targeted interventions, labi na sa mga lugar nga taas ang kaso sa wa pagtubo sa mga bata, ug aron i-integrate ang nutrition initiatives sa lokal nga development plans ug budgets. — /MEL (BANAT NEWS)