Checker natagak sa barko

CEBU, Philippines — Padayung gipangita sa Philippine Coastguard ang checker sa barko nga aksidenteng natagak sa barko  samtang nisaka kini sa hagdan padung sa usa ka overseas nga barko  diha sa kadagatan sa Sitio Rattan, Barangay Tanke, Dakbayan sa Talisay niadtong Biyernes sa buntag.

Nailhan ang checker nga si John Carel Romano, 26 anyos, minyo nga taga Barangay Quiot, Syudad sa Sugbo ug checker sa Webb Fontaine Asia nga usa ka foreign vessel.

Matud pa ni Petty Officer Second Class Roland Lorenza, commander sa Talisay City Coast Guard nga dali silang niresponde human nakadawat sa taho. Nakig alayon sila sa Philippine Coast Guard District 7 headquarters ug nihimo sa search and rescue operation.

Sa inisyal nga imbistigasyon ug sa pamahayag sa mga crew sa barko nga si Romano nikatkat sa pilot ladder kauban ang iyang surveyor apan nadakin-as kini ug natagak padung sa dagat.

Gilusad dayun ang search and rescue operation apan naundang human nahutdan og oxygen ang mga tanke sa mga divers sa PCG.

Sa ilang pagbalik wala nasab sila mipugos pag-dive tungod kay nausab ang kondisyon sa kadagatan ug peligro para sa mga divers.

Gialerto na sa coast guard sa Talisay ang tanan nilang units sa pagtaho kung aduna man sila mamatikdan sa nawagtang nga checker sa barko.

Si Romano nagsul-ob itom nga t-shirt, beige nga shorts, adunay fair complexion, dauton ug 5,7” ang gitas-on.

Ang pagpahigayon sa search and rescue operation magpadayon karong adlawa. (BANAT NEWS)