Vendor gikulata sa taga PROBE

CEBU, Philippines — Nidangop sa buhatan ni Konsehal Pastor “Jun” Alcover Jr. ang usa ka napangos nga ambulant vendor nga matud pa nga gikulata sa usa ka sakop sa Prevention Restoration Order Beautification and Enforcement (PROBE) atol sa gipahigayon nga clearing operation sa Plaza Sugbo sa Dakbayan sa Sugbo niadtong Lunes, Pebrero 16, 2026.

Giila ang maong manindahay nga si Rachel Romano, 27 anyos, usa ka manindahay og mga keychain ug refrigerator magnet.

Ang biktima naghilak ug nagkadugo ang suwang nga niduol sa buhatan ni Alcover kay matud pa nga gibadlong kini sakop sa PROBE apan adunay pakapin nga pagpangulata.

Nitug-an si Romano pinaagi sa interbyu sa DyHP nga ang iyang samad sa suwang tungod kini sa ilang pagbinunlutay sa iyang baligya ug pagsumbag kaniya sa sakop sa PROBE nga nagsul-ob og singsing.

Matud pa niya, tulo ka sakop sa PROBE ang nagtinabangay pagdakop kaniya apan kadtong usa maoy agresibo kaayo nga nikulata niya.

Ikaduha na kini nga hitaboa nga naglambigit sa mga sakop sa PROBE nga nanapat og mga vendors sulod sa nakalabay nag tulo ka buwan, ang una nahitabo diha atubangan sa City Hall.

Gisaysay ni Romano nga sayod siya sa patakaran sa syudad nga gidili  ang pagpaninda sa Plaza Sugbo apan gihangyo niya ang maong sakop sa PROBE nga humanon lang una niya ang iyang transaksyon sa iyang tulo ka customer ug mohawa na siya.

Apan gikatahong kalit lang nga gibunlot ang plywood nga gibutangan niya sa iyang paninda maong iyaha kining gipugngan kay mao nalang ni ang iyang paninda ug gisaligan sa iyang panginabuhian, apan gidapatan siya.

Ang maong komosyon nag-viral sa Facebook ug naputos sa pagsaway ang PROBE sa mga netizens.

Si Alcover sa iyang bahin miingon nga mga salbahis gyud ang mga sakop sa PROBE kung basehan ang mga video nga nikatap.

“Grabeee na gyud ka salbahis ni sila kay gi-encouraged man sad sa mayor ilang kalihokan kay samokan, hugawan ug mura gi-consider na sila nga sagbot sa katilingban ang mga pobreng ambulant vendors,” suma pa ni Alcover.

Hangtud ning balita, walay opisyal sa PROBE nga niatubang sa media. IBM BANAT NEWS