Eran: Pabor-pabor pagkolekta sa basura

CEBU, Philippines — Gisaway ni Konsehal Harry Eran ang gihulagway niyang walay koordinasyon sa koleksyon sa basura sa siyudad sa Sugbu ug matud pa adunay nahitabong “pabor-pabor” sa pagpangolekta.

Sa usa ka privilege speech ni Eran niadtong Lunes, giawhag sa konsehal ang mas istriktong koordinasyon sa pagpadala og garbage trucks sa mga barangay human mitumaw ang mga reklamo nga adunay koleksyon nga gihimo nga wala pahibaw-a ang mga opisyal sa barangay.

Matud pa niya gitug-anan siya sa mga opisyal sa barangay kabahin sa pagsulod sa mga pribadong garbage trucks nga PINOY BASURA ug sa mga yunit nga gipanag-iya sa siyudad nga walay hustong koordinasyon sa barangay.

 “Kung ang garbage truck ipadala sa usa ka komunidad nga wala kahibalo ang barangay, mahitabo ang pabor-pabor nga sistema. Usa ra ka balay ang makabenepisyo samtang ang tibuok silingan mabilin. Ang ilang basura magtapok, magtipun-og ug magkadaghan,” dugang pa niya.

Matud niya gausik lang kini sa krudo ug manpower, ug labaw sa tanan, makapaluya sa pagsalig sa katawhan sa gobyerno.

Samtang nag-atubang ang siyudad og seryosong hagit sa waste management, dili angay nga ang limitadong pundo mapadung sa personal nga interes.

Matud niya ang madaut ani mao ang mga opisyal sa barangay kay mapasanginlan silang dunay gipaboran.

Sumala pa sa konsehal ang barangay mao ang frontline bahin sa koleksyon sa basura kay sila maoy dapat masayod sa iskedyul, sa lugar, ug sa mga panginahanglan sa ilang katawhan.

Una nang gitaho ni Mayor Nestor Archival nga kinahanglang ang mga barangay kapitan mo eskedyul sa pagkolekta sa mga basura sa syudad human nga gilimitahan ni Consolacion Mayor Teresa “Nene” Alegado ang paglabay og basura gikan sa syudad paingon sa Asian Energy.

Si Alegado niingon nga niuyon siya sa hangyo ni Archival nga makalabay kini hangtud sa Marso 31, 2026 apan kinahanglan nga dili kini molapas ngadto sa 200 ka tonelada matag adlaw.

Ang siyudad adunay gibana-bana nga 500 ka toneladang basurang makolekta kada adlaw.

Maong gisugyot ni Archival nga ipadugmok sa makina pinaagi sa shredder machine ang ubang mga basura aron mokunhod hakuton padung sa Consolacion. IBM  BANAT NEWS