TESDA Skills Passport Mobile App gilusad

CEBU, Philippines — Gilusad ni Presidente Ferdinand Marcos Jr. ang TESDA Skills Passport Mobile App, usa ni ka digital platform nga naghiusa sa technical-vocational training, scholarships, accreditation, ug job opportunities aron mas paspas ug mas sayon ang pag-access sa skills development ug trabaho sa mga Pilipino.

Sumala sa Technical Education and Skills Development Authority (TESDA), ang app makapasayon sa mga users nga matan-aw ug ma-store ang ilang national certificates ug training records, maka browse sa online courses, maka-apply sa scholarships, ug makakita og job opportunities sa usa ka integrated nga sistema.

Nigamit kini og blockchain technology aron masiguro ang pagka-authentic sa credentials ug malikayan ang pagpalsipikar sa dokumento.

Gidisenyo ang plataporma nga adunay AI assistant nga motubag sa mga pangutana sa user ug motabang sa job-matching, nga nagkonektar sa TESDA graduates ngadto sa nagkalain-laing industriya sa tibuok nasud.

Sumala sa TESDA, target sa app ang pagserbisyo sa kapin usa ka milyon ka trabahante ug estudyante pinaagi sa mas sayon ug paspas nga online access sa training, certification, ug employment.

Suportado kini sa Department of Education (DepEd) ilabina na kay kini makatabang og dako sa mga Senior High School–TVL graduates nga gustong makatrabaho o mopadayon pagdugang og skills training.

Libre nga ma-download ang TESDA Skills Passport app sa Android ug iOS devices, ug mahimong magamit sa mga rehistradong indibidwal, lakip na ang non-TESDA graduates nga nakarehistro sa PhilSys alang sa identity verification. IBM BANAT NEWS