CDRRMO sa siyudad sa Mandaue gipasidunggan

CEBU, Philippines — Giila ang mga talagsaong nahimo sa mga personnel sa City Disaster Risk Reduction and Management Office (CDRRMO) sa Siyudad sa Mandaue nga maoy hinungdan nga kini gipasidunggan.

Nadawat ang pasidungog sa CDRRMO atol sa DRRM Partners Appreciation Program sa Gawad Kalasag Regional Awarding Ceremony nga gipahigayon sa Golden Prince Hotel & Suites niadtong Lunes, Pebrero 16, 2026.

Sa nasayran nga ang Siyudad sa Mandaue usa sa mga nag-una nga highly urbanized cities sa tibuok nasod sa Local DRRM Office and Council category nga gihatagan og Gawad Kalasag Seal nga adunay sulat gikan sa National Disaster Risk Reduction and Management Council.

Ang maong recognition gidawat ni Mandaue City Mayor Thadeo Jovito “Jonkie” Ouano ug ni CDRRMO Head Buddy Ybañez.

Kini isip pag-ila sa maayong serbisyo, hugot nga commitment, ug sakripisyo sa pagpatuman sa mga programa sa disaster risk reduction and management sa siyudad.

Ang pasidungog usa ka pag-ila sa mga nahimo sa dakbayan aron mapalig-on ang lokal ug rehiyonal nga pagdumala sa mga kalamidad.

Gitambongan ang maong awarding ceremony sa mga pangu ug representante sa nagkadaiyang Local DRRMO, mga mayor sa probinsya sa Sugbo, mga representante sa Office of Civil Defense, ug uban pang opisyales gikan sa nagkadaiyang rehiyon sa tibuok Pilipinas.  MEL BANAT NEWS