Magtiayon patay sa SRP

CEBU, Philippines — Masulob-on para sa usa ka pamilya ang pagsaulog nila sa Valentine’s Day niadtong Pebrero 14, tungod sa aksidente nga gikamatay sa ilang mga senior citizen samtang ang duha nitabok sa Cebu South Road Properties.

Ang magtiayon mao ang 67- anyos nga si Salvador Geraldizo Jr. ug kapikas nga 68- anyos nga si Cecilia Geraldizo, pulos mga residente sa Barangay Sawang Calero sa Cebu City.

Nasayran sa The Freeman/Banat News nga ang magtiayon naa sa lugar aron mag-celebrate sa Valentine’s day kauban sa ilang mga anak sa us aka sikat nga food outlet sa maong lugar.

Human matud pa sa ilang panihapon, nakadesider ang magtiayon nga maglakawlakaw sa usa sa mga sikat nga suroyanan diha sa baybayon sa SRP labang sa ilang gikan-an.

Nianang pagka pasado alas- 7 p.m. namalik ang duha padung sa fast-food outlet diin nila gibilin ang ilang mga anak ug nitabok sila agi sa center island. Apan samtang sila nilabang, napunggit sila sa us aka delivery van ug nalatayan sila human ang duha nangalagpot.

Ang 38-anyos nga drayber giila nga si Charlie Sabellano, taga lungsod sa Borbon. Padung kini sa amihanan subay sa middle lane karga ang mga “ukay-ukay” kauban ang duha ka truck helpers.

Sumala pa sa Cebu City Police Office (CCPO) - Traffic Enforcement Unit (TEU), human nga nabanggaan ang duha nalatayan pa gyud sila sa maong delivery van. Patay dihadiha ang lalaking Geraldizo samtang gidala sa Cebu City Medical Center ang ginang apan gideklarar sab kini nga dead on arrival.

Sa wala pa ang hitabo, ang anak nga babaye sa magtiayon ug bana niini nahibulong nganong dugay nakabalik ang duha.

Nakabantay dayun sila sa paghuot sa trapiko sa dalan hinungdan nga gisusi nila kun unsay hinungdan, ug didto ilang nakita ang ilang mga ginikanan nga nabanggaan diay.

Gidakop sa mga polis si Sabellano ug gidala sa TEU office. Gipaubos dayun siya sa mandatory liquor ug drug tests apan negatibo tanan ang resulta. Gikatakda siyang pasakaan og kasong Reckless Imprudence Resulting in Double Homicide. Sa pag-post sa The Freeman sa Facebook Account niini bahin sa report sa miani kini og daghang mga komento ug reaksyon gikan sa mga netizens bahin sa sitwasyon sa CSCR ug mga kakulangon sa maong dalan para sa kaluwasan sa tanan. Usa niini ang netizen nga si Erica Jahn, kinsa nanawagan nga dapat prayoridad ang pagtukod og walkways ug footbridges para sa mga pedestrians sa lugar aron luwas silang makalabang—kay sa pagkakaron wala gyud niini ang SRP nga unta usa man kini ka expressway.

“Drivers already struggle with traffic because of poorly designed roads and narrow highways that lack pedestrian walkways. Please prioritize building walkways and accessible footbridges with ramps, lighting, and protective barriers to keep people safe,” komento pa niya.

Samtang usa ka Harriet Torreon sab ang miawhag sa gobiyerno nga aksyonan ang hustong enforcement sa road safety policies kay parehong apektado ani ang mga motorista ug mga pedestrians. “Pila pa man ka kinabuhi makalas oy before ninyo ni aksyunan? The reason why patuyang ra na ang mga tao is because wala’y manakop. Please, please do something about this,” komento pa niya.

“Isip pedestrian, gikapoy nami having to fight for our lives every time we cross the street. And isip driver, hasol kaayo nga kami ma-blame if makaligis mi’g tao nga magpataka’g labang. [I] hope the government can do something about this,” dugang pa niya. — /IBM (BANAT NEWS)