Ordinansahon batok sa online scam gitun-an sa Committee on Laws

CEBU, Philippines — Aron maprotektahan ang mga Sugboanon batok sa mga hulga sa online scam, tun-an sa Committee on Laws sa konseho sa Dakbayan sa Sugbo ang giduso nga ordinansahon ni Konsehal Edgardo "Jaypee" Labella II nga “Cebu City Digital Safety Ordinance” tumong niini ang pagtukod sa usa ka komprehensibong digital safety and protection framework lakip ang pag-umol sa Inter-Agency Digital Safety Coordination Council (IADSCC).

Matud ni Labella nga mao niyang lakang nitumaw tungod sa nagkadaghang reklamo kabahin sa online scams, phishing attacks, identity theft, fake accounts, ug uban pang cyber-enabled fraud nga nakaapekto sa mga indibidwal ug mga negosyo sa siyudad.

Gani daghan na karon ang magpakaaron-ingnon nga opisyal nga online page sa siyudad, mag-operate og peke nga account nga nag-angkon nga adunay koneksiyon sa kagamhanan, ug kapakyasan sa mga opisina o accredited partners sa pagsunod sa digital safety protocols.

Ang ordinansahon makatabang pinaagi sa pagbutang og pormal ug coordinated nga sestema alang sa paglikay, pag-report ug pagpagawas og pampubliko nga pahibalo kalabot sa digital safety incidents.

Ang umolon nga IADSCC mahimong coordinating body sa siyudad sa pag-atubang sa online scams, impersonation, cyber fraud, ug susamang hulga diin pangulohan kini ni Mayor Nestor Archival, Sr. o sa iyang awtorisadong representante. Samtang si Labella kinsa tsirman sa Committee on Information and Communications Technology ang mahimong vice chairperson.

Langkuban usab kini sa mga representante gikan sa Cebu City Police Office, Philippine National Police Anti-Cybercrime Group, National Bureau of Investigation-7, Department of Information and Communications Technology, National Telecommunications Commission, ug ubang ahensiya nga adunay kalabotan niini.

Ang mga kalihokan sa maong ordinansahon mao ang pagtukod og opisyal nga reporting channels sa siyudad sama sa hotline, online reporting portal, ug mga help desk aron dali matubag ang mga report ug reklamo sa mga Sugboanon.

Ang madawat nga mga reklamo moagi sa intake, dokumentasyon, preliminary classification, ug referral ngadto sa hustong ahensiya.

Tumong usab sa sestema nga tudloan ang mga residente unsaon pagpreserba sa digital evidence sama sa screenshots, chat logs, transaction references, ug URLs, nga dili mosupak sa nasudnong evidentiary standards.

Ang ordinansahon nag-uyon sa kasamtangang mga balaod sa nasud lakip ang Cybercrime Prevention Act of 2012, Electronic Commerce Act of 2000, Data Privacy Act of 2012, Access Devices Regulation Act of 1998, Anti-Online Sexual Abuse or Exploitation of Children and Anti-CSAEM Act, ug Anti-Photo and Video Voyeurism Act of 2009.

Ang mga silot sa makalapas, una ang written warning ug mandatory compliance, sunod pagbayad ug multa nga P5,000 ug posibleng suspension o pagbawi sa permit o accreditation. — /BDB (BANAT NEWS)