PhilHealth nipalambo sa Yaman ng Kalusugan Program

CEBU, Philippines — Gibutang sa Philippine Health Insurance Corporation (PhilHealth) ang Yaman ng Kalusugan Program (YAKAP) sa sentro sa ilang pagsaulog sa National Health Insurance Program (NHIP) Month.

Kini nagpasabot sa importansya sa primary care isip pundasyon sa accessible ug patas nga serbisyong pangkalusugan alang sa mga Pilipino.

“Ngayong Buwan ng Pambansang Segurong Pangkalusugan, pinalalakas natin ang primary care upang masiguro na ang bawat pamilyang Pilipino ay may agarang access sa napapanahon, dekalidad, at komprehensibong serbisyong pangkalusugan sa pamamagitan ng PhilHealth YAKAP,” matud pa ni PhilHealth President and Chief Executive Officer Dr. Edwin M. Mercado sa usa ka mensahe.

Pinaagi sa YAKAP program, ang mga miyembro sa PhilHealth makadawat og konsultasyon, piling laboratory services, ug essential medicines gikan sa accredited primary care providers.

Ang inisyatiba nag-awhag sa mga pamilya nga magparehistro sa ilang napiling provider aron masiguro ang padayon nga health monitoring, sayong pag-detect sa sakit, ug preventive care, nga makatabang sa pagpakunhod sa dili kinahanglang pagpahospital ug pagpalambo sa kinatibuk-ang kahimsog.

Hangtod Enero 2026, mikabat na sa 26.75 milyon ka Pilipino ang na-empanel ubos sa programa. Narekord usab sa PhilHealth ang 40.01 milyon ka YAKAP clinic selections niadtong 2025 ug 21.72 milyon sa 2026, nga nagpakita sa nagkadakong partisipasyon sa mga miyembro sa primary care services.

 Gisaulog ubos sa Presidential Proclamation No. 1400, series of 2007, ang NHIP Month nga naghatag og gibug-aton sa papel sa PhilHealth sa pagpalambo sa social solidarity ug financial risk protection samtang gipalig-on ang primary care sa tibuok nasod.

Atol sa public forum niadtong Pebrero 12, miingon si PhilHealth Regional Office 7 Regional Vice President Marjorie A. Cabrieto nga padayon ang suporta sa state insurer sa mga Pilipino nga dili maka afford og medical care, gikan sa primary care hangtod sa hospitalization.

Midugang siya nga sakop usab sa PhilHealth ang inpatient confinement ug outpatient services, lakip ang mga kaso nga dili molapas og 24 oras, minor surgeries, hemodialysis, cataract extraction, ug uban pang medical procedures.

Gipasabot ni Cabrieto nga ang YAKAP program nagpunting sa preventive care.

“Essentially, kini ang mga services nato na ginahatag sa atong mga miyembro, Filipinos here within the Philippines and also outside of the Philippines,” matud pa ni Cabrieto.

Ang Overseas Filipino Workers (OFWs) nga miyembro sa PhilHealth mahimo usab makapahimulos sa benepisyo bisan pa kon ma-admit sa ospital sa gawas sa nasod.

Isip kabahin sa pagsaulog sa NHIP Month, miingon si Field Operations Division Chief Jenet Ann Advincula nga gilusad sa PhilHealth ang community-based activities aron madala ang serbisyo sa mas duol sa            publiko.

Matod niya, adunay mobile service desks nga gipahimutang sa pipila ka mga mall, samtang adunay espesyal nga service perks nga gihatag sa unang 50 ka kliyente sa local health insurance offices sa Cebu, Bohol, Negros Oriental, ug Siquijor. (BANAT NEWS)