Drainage project sa A.S. Fortuna hapit na makompleto

CEBU, Philippines — Gilauman nga hingpit na nga mahuman ang kaugmaran sa drainage project diha sa dalan A. S. Fortuna sa Barangay Banilad, Siyudad sa Mandaue nga gipanglantawang makapahunong sa problema sa pagbaha sa maong lugar kun mobunok ang uwan.

Ang drainage project sa nahisgotang dapit nga duol sa usa ka punerarya  gipatuman kini ubos sa Department of Public Works and Highways (DPWH) nga unang gisugdan sa panaho pa sa kanhi administration ni kanhi mayor Jonas Cortes.

Gipadayon kini  ni Mayor Thadeo Jovito  "Jonkie"  Ouano.  Usa kini sa iyang mga unang gisusi sa dihang siya milingkod .

Niadtong.miaging Miyerkules gibalikan sa pagsusi ni Ouano ang maong proyekto ug nakita  niini ang kadako sa kausaban sa pagdagayday sa tubig sa lugar human nga gihabwaan og mga basura ug lapok.

Gani sa nanglabay nga mga pag-ulan wala na nasinati pag-usab ang grabe kataas nga tubig diha sa maong dalan nga dunay panahon nga molapas sa hawak sa tawo maong dili na maagian sa mga sakyanan. (BANAT NEWS)