Armas bayloan og bugas ug groceries

CEBU, Philippines — Usa ka programa kontra ilegal nga mga armas ang gilusad sa Canlaon City Police Station aron ganahan nga boluntaryong itahan sa mga nagtinil niini ang ilang mga armas.

Ubos sa pamunoan ni Police Lieutenant Colonel Florendo Fajardo gilusad ang "Kontra Boga" program, ingon man "Armas Baylo Grocery ug Bugas" program.

Si Fajardo bag-ohay lang nakadawat og usa ka improvised shotgun o mas naila nga sumpak, apil ang upat ka bala nga 12-gauge niini nga boluntaryong gi-surrender sa miaging adlaw sa Barangay Mabigo, Canlaon City, Negros Oriental.  Usa ka concerned citizen ang nitugyan sa armas.

Kabahin kini sa kampanya sa kapolisan batok sa ilegal nga armas ug para sa kaluwasan sa publiko gikan sa mga krimen nga nigamit og mga armas.

Isip pag-ila sa boluntaryong pag-surrender, ang concerned citizen nakadawat og lima ka kilong bugas ug nagkalain-laing groceries. (BANAT NEWS)