Nakapiyansa: Kaso sa “bodyguards’ gi-dismiss

CEBU, Philippines — Nakapiyansa na ang 21-anyos nga suspek sa pagkamatay sa 23-anyos nga batan-ong negosyante nga biktima sa hit-and-run sa Paseo Saturnino, Maria Luisa Road, Barangay Banilad, Cebu City niadtong Domingo sa kadlawon, Pebrero 8, 2026.

Si Sean Andrew Pajarillo nakapiyansa og P72,000 alang sa temporaryo niyang kagawasan human nabanggaan ug napatay ang negosyanreng si Kingston Ralph Cheng.

Ang iyang abogado nga si Atty. Julito Añora Jr., misaad nga dili motago ang iyang kliyente ug moatubang gyud kini sa arraignment sa kasong Reckless Imprudence Resulting in Homicide sa korte.

"I received an anonymous call yesterday nga usa kunoy plans nga nigawas nga dalhon siya sa Canada. I actually told the parents to never do anything that would raise the case. If ilarga gyud siya sa Canada, unya during the hearing dili sila mo attend, so technically, ma revoke ang bail. Mo-issue og warrant of arrest, mapriso," pasalig pa ni Añora.

Gitug-an sab ni Añora nga wala pa gyud niya naestorya og tarong ang iyang kliyente kay nagsige lang kini og hilak ug dili motingog.

"Wa gyud. Di gyud siya moestorya. I went there to the hospital. Unsa man nahitabo, imo ni? How true? Dili gyud siya motingog. I don't know if... Every time I ask him questions, mohilak man. Murag na-trauma sad siya," ni Añora pa.

 “Bodyguards”

Sa laing bahin, gi-dismiss sa piskalya ang gipasakang kaso batok sa lima ka giingong ‘bodyguards’ ni Pajarillo nga giingong gipadala sa iyang pamilya aron siya bantayan samtang gi-confine sa usa ka pribadong tambalanan sa Mandaue City. Giaresto niadtong Huwebes, Pebrero 13 tungod sa giingong paglapas sa Republic Act 11917 o ang Private Security Services Industry Act, tungod sa pagpanarbaho sa security profession nga walay otorisasyon.

Ang lima nga pulos bouncers sa disco bar, kauban ang ilang abogado gipaubos sa inquest proceedings sa korte sa Mandaue City.

Apan ang tigpamaba sa Mandaue City Police Office nga si Police Lt. Col. Mercy Villaro-Kantuna miingon sa media kagahapon nga gi-dismiss ang kaso. 

Matud pang Villaro-Kantuna, miadto ang lima sa maong ospital ug nagpaila sa mga gwardiya sa maong tambalanan nga mga “private security” sila ni Pajarillo.

Wala sila pasudla sa custodial officer sa Traffic Enforcement Unit (TEU) nga maoy nagbantay kang Pajarillo kinsa gi-hospital arrest.

Ang Cebu City Police Office ug Task Force HUSAY—nga gilangkuban sa Regional Civil Security Unit 7, Integrity Monitoring and Enforcement Group 7, ug Regional Police Security and Protection Unit 7— misusi sa backgrounds sa lima human wala silay napakitang License to Exercise Security Profession (LESP) o bisan otorisasyon gikan sa usa ka lehitimong private security agency hinungdan nga sila gidakop.

Apan usa sa mga legal counsel ni Pajarillo nga si Atty. Nodger Jude Dalman mihimakak sa mga alegasyon nga gi-hire sa pamilya isip security escorts ang lima.

“Acquainted sila sa family ni Sean. It’s their discretion naman. Dili na ‘ta ka-question unsay ilang intention ana basta family acquaintance sila. They are not hired as security escorts,” matud ni Dalman.

Wala hinuon siya nitubag sa pangutana kun kaning lima, bouncers ba sa disco bar diin nakita si Pajarillo nga nag-party sa usa ka video.

Sa dugang kalamboan, si Konsehal Harold Kendrick Go moduso sa gitawag niyang “Kingston Ralph Ordinance” sa konseho. Gusto niyang papanubagon ang mga establisementong magpatuyang og baligya og ilimnong makahubog sa ilang mga kustomer bisan og naluro na sa kahubog.

“This is about saving lives, strengthening responsible business practices, and making our streets safer for everyone,” suma pa ni Go.

Sakop sa maong ordinansahon ang mga bars, disco, restaurant, hotel, sari-sari store ug uban pang establisemento nga namaligya og ilimnong makahubog.

 Ang silot sa unang paglapas, multa nga P20,000 ug suspensiyon sa liquor permit sulod sa 30 ka adlaw. Sa ikaduhang paglapas, multa nga P50,000 ug ma-revoke ang liquor permit ug sa ikatulong paglapas, makamulta og P100,000 ug ma-revoke ang business permit ug pasirad-an ang establisemento. IBM BANAT NEWS