Konseho mosusi sa JVA subay sa pagpalambo sa Carbon Market
CEBU, Philippines — Susihon sa konseho sa Dakbayan sa Sugbo ang joint venture agreement (JVA) sa redevelopment sa Carbon Public Market human sa lihok protesta nga gipahigayon sa mga vendors niadtong Pebrero 5, 2026. Lakip sa susihon ang petisyon nga giduso ni Bise Mayor Tomas Osmeña ngadto sa Korte Suprema.
Si Minority Floor Leader Konsehal Sisinio “Bebs” Andales nanawagan og usa ka executive session aron matuki ug mahatagan og katin-awan ang mga isyu sa legalidad ug epekto sa proyekto nga gipangulohan sa Megawide Construction Corporation pinaagi sa Cebu2World Development Inc. (C2W).
Imbitado sa maong session ang representante gikan sa Megawide, Cebu2World Development Inc. (C2W), City Legal Office, Commission on Audit, Cebu Port Authority, ug ang mga vendor association ug nagkadaiyang civil society groups. Matud pa ni Andales nga obligasyon sa konseho ang mosusi sa legal nga basehan sa petition, ang kahimtang sa implementasyon ug pinansyal nga aspeto sa proyekto, ug ang mga pagpanagang alang sa interes sa publiko, manindahay ug ang pagpreserbar sa kabilin.
Gipahibawo usab sa Cebu2World Development Inc. (C2W) nga dili pa magsugod ang pagpangolekta og market fees sa Carbon Market hangtod makadawat og pormal nga direktiba gikan sa Cebu City Government, ug magsugod lamang human sa tulo ka bulan nga transition period. Suma ni Jynx Chanjueco, marketing ug corporate affairs manager sa C2W, nga ang kompanya misumite og sulat niadtong Enero 27, 2026 ngadto kang Mayor Nestor Archival aron ipahibalo ang plano sa bag-o nga koleksyon ubos sa 2021 Joint Venture Agreement (JVA) tali sa siyudad ug C2W. Giingon sa C2W nga ang kasamtangang bayranan nga P8.50 matag square meter kada adlaw ubos sa 2017 Market Code magpabilin sulod sa mosunod nga tulo ka tuig, ug walay pagbag?o sa rate kung walay pagtugot gikan sa City Council.
Kahinumduman, ang kasabutan nagsugod niadtong Enero 11, 2021 sa dihang gipirmahan ni anhing Mayor Edgardo Labella ang orihinal nga kasabutan ug gipirmahan sab ni kanhi mayor Michael Rama ang usa ka supplemental agreement niadtong Hulyo 31, 2022 nga nagpasaka sa kinatibuk-ang investment project gikan sa P5.5 bilyon ngadto sa P8 bilyon.
Nisugyot si Konsehal Mikel Rama nga magpahigayon og executive session nga gikatakda karong Marso 17 aron nga adunay igo nga panahon nga matuki ang dakong isyu sa siyudad. (BANAT NEWS)
- Latest















