Mipalit og gatas nalumos?

CEBU, Philippines — Patay na nga nakit-an ang usa ka 49-anyos nga babaye sa may Batawang Bridge, Barangay Tabunok, Lungsod sa Tabuelan kagahapon sa buntag, Huwebes, Pebrero 12, 2026.

Ang babaye giila nga si Susan Guinita Arellano, 49, taga Sitio Abante, Barangay Bongon, Lungsod sa Tabuelan. Apan nahibulong ang iyang pamilya sa sirkumstansiya sa iyang kamatayon.

Nagkanayon si Police Master Sergeant Jemiren Arnado, imbesigador sa Tabuelan Municipal Police Station nga sigon sa bana niini nilakaw si Susan niadtong adlaw nga Miyerkules kay niadto og lungsod aron mopalit og gatas para sa ilang anak.

Apan matud pa wala kini niuli kay gipamalihug ra og padala ang gatas sa usa ka habal-habal driver didto sa ilaha.

Nahibulong ang bana kay misawop nalang ang adlaw apan wala pa gihapon kini makabalik hinungdan nga ilaha kining gipangita.

Ug kagahapon sa buntag usa ka driver sa usa ka trucking company nga si Jerry Ortiz Dela Raya matud pa nakakita sa patay’ng lawas sa usa ka babaye diha sa Batawang Bridge ug dali niining gipahibalo ang usa ka Nerrisa Colipano diha sa lugar. Si Colipano na maoy nitawag sa kapolisan kalabot sa nakit-ang patay'ng lawas.

"Niresponde atong kapulisan inubanan sa coast guard kay labangonon man kay naay sapa," sigon ni PMSgt. Arnado.

Sa inisyal nga paghiling sa doktor sa lawas  gituohang nalumos kini. Apan tungod sa mga pangutana sa mga kabanay sa mga sirkumstansiya kun nganong naabot kini didto, palawman pa sa kapolisan ang ilang imbestigasyon.

Mismo ang mga tagtungod gusto nga ipaubos sa otopsiya ang lawas aron masuta kun dunay foul play. (BANAT NEWS)