Kapolisan mo inspection sa mga establisamento sa Talisay

CEBU, Philippines — Himoon sa kapolisan sa Talisay ang joint inspection sa mga balay patigayon nga dagsaon ug mga tawo aron maglingaw-lingaw sama sa imnanan ug uban pa.

Gipahibawo ni PLT. Col. Homobuno Sayon, Hepe sa Talisay City Police Station nga sugod karong adlawa, Biyernes mohimo sila og pakisusi sa mga establisamento kauban ang mga opisyal sa barangay ug sa mga sakop sa licensing office sa siyudad.

Lakip sa ilang susihon kun nakatuman ba ang mga bay patigayon sa lagda nga nalatid sa ilang business permit.   Gipadayag ni Sayon ang pag-inom inom sa publiko hingpit gihapon kini nga gibawal sa Talisay City ug niawhag sa tanan nga kanunay lang magmabinantayon ug magpabilin nga kalmado ilabi na kun makainom.

Samtang gipahibalo usab ni Sayon, nga nakig-alayon na sila sa mga nagdumala sa mga Hotel ug Inn nga anaa sa dakbayan ilabi na nonot sa pagsaulog sa Valentines` Day aron masiguro nga walay mga minor de edad nga makasulod sa maong mga establisamento.

Samtang sa laing bahin nabantayan na usab ang pagsaka sa presyo sa mga buwak sa Carbon Public Market subay sa kasaulogan sa Valentines` Day.

Adunay mga buwak nga gikan lang dinhi sa Sugbo ingon man sa gawas sa nasud sama sa China.

Ang presyo sa mga buwak naggikan sa tag P700 ngadto sa P800 samtang ang gikan sa China P1,200 ngadto sa P1,300 nga adunay napulo lang ka lusok. Ang maong presyo mas momahal pa kung mahimo na kining boquet nga gikan sa P2,500 ngadto sa P3,500. (BANAT NEWS)