Online booking scams

CEBU, Philippines — Pipila sa mga nanagiya og mga resorts sa Lungsod sa Santa Fe, Isla sa Bantayan ang nitiyabaw human sila nabiktima sa Identity Theft diha sa ilang mga online portal sa mga scammers aron makapamiktima og mga turista.

Ang One Island Tourism Association pinagulohan sa ilang presidente Nelson Yuvallos, uban sa mga opisyal ug sakop niini lakip ang mga sakop sa law enforcement agency atol sa press conference mibutyag nga  dili mominos sa 200 na ka mga tawo ang naabot sa isla nga nailad.

Gikatahong nagpa book sila sa mga resort didto ug nibayad pinaagi sa online payment apan sa pag-abot didto na scam sila kay wala sila ma-book sa resort.

Sumala pa ni Yuvallos, sukad pa sa nilabay nga tuig pa hangtud kagahapon dunay nangailad.

Hinungdan nagpatabang na sila sa mga tigbalita aron mahunong na ang pagpangilad.

Matud pa niya luoy ang mga gikan sa laing dapit nga moabot sa isla aron makabakasyon apan problema na hinoon ang masugatan kay na-scam sila.

Gitug-an ni Yuvallos, igo nalang sa pagtaho sa kapulisan ang mga biktima samtang silang mga operator sa mga resorts mihatag nalang og discount lakip ang libre nga breakfast agi og tabang sa mga nailad.

Ang mga scammers migamit sa mga portals sa mga resorts apan gi-clone kini ug maoy ilang gigamit sa pagpangilad.

Sila kunohay ang ahente o representante sa resort nga mo-book ug sila say  modawat ug mokolekta sa reservation fees ug uban pa pinaagi sa online transactions.

Apil sa matud pa gitanyag mao ang barato kaayo nga presyo sa mga rooms, pagkaon ug unlimited jetski use nga sa pagkatinuod dakong bakak kay wala nagtanyag ani ang mga resorts.

Ang ilang kapunongan nidangop na sa buhatan sa National Bureau of Investigation Central Visayas ug sa kapulisan aron mahunong na kini. Ilabi na nga gipangandaman nila ang Semana Santa kay ang isla sa Bantayan dagsaonon sa mga turista anang mga panahona.

Si Atty. Wenceslao Galendez, sa NBI-CEVRO mitambag sa publiko nga dili dapat motuo dayun sa mga tanyag  ilabi na kun grabe ka barato. Kinahanglang klaruhon nila ang ilang mga ka transaksyon.

Si Sta. Fe Konsehal Jaypee Lao, tsirman sa committee on tourism miawhag sa mga gustong mobakasyon sa ilang isla nga adto sa mga LGU social media tourism pages motan-aw aron sigurado silang dili sila ma-scam.

Ang maong modus operandi sa online booking scams gikabalak-an nga makaapektar sa imahe sa turismo dili lang sa Isla sa Bantayan kondili tibuok probinsya sa Sugbu. IBM BANAT NEWS