Manipis Road ug Campo 4 peligrong again   

CEBU, Philippines — Gimando ni Mayor Gerald Anthony "Samsam" Gullas sa Dakbayan sa Talisay nga dili una paagian ang bakilid nga bahin sa Sitio Nangka, Barangay Campo 4, bukiran nga bahin sa siyudad.

Kini tungod sa nakitang makagitib sa kasingkasing nga sitwasyon sa mga residente lakip sa mga tinun-an nga namidpid sa pangpang kilid sa naghaguros nga sapa sa ubos nga nag trending sa social media karon.

Sa video nga gi post ni Rose Abarias, makita ang makahadlok nga kahimtang sa mga bata ug hamtong nga nagbutang og hagdan-hagdan aron makaaagi sa maong lugar.

Matud pa ni Abarias, adlaw nga Lunes kadto tungod kay anaa ra man siya sa ilang balay  ug pagkakita niya sa tabok sa sapa sa maong mga tawo iyaha kining gikuhaan og video.

Dugang pa ni Abarias, base sa pamahayag sa pipila human naguba ang hanging bridge anha na tig-agian ang mga residente ilabi na kung magbaha aron makauli.

Gipadayag sa uploader nga makahahadlok kaayo tan-awon ang kahimtang sa mga tawo ilabi na kung simbako madakin-as sila sa agianan ug diretso og katagak sa sapa.

Si Campo 4 Barangay Kapitan Rowena Edar, niangkon nga iyang mga konstituwente ang nakita sa video ug siya mismo miingon nga risgo kaayo ang ilang gibuhat ilabi kun dautan ang panahon.

Matud niya naguba sa bagyong Tino ang hanging bridge nga bag-ohay lang nahuman niadtong Mayo sa miaging tuig. Dunay dili mominos napulo ka panimalay ang naa sa maong dapit.

Si Jonathan Tumulak ang pangulo sa City of Talisay Traffic Operations Development Authority kon CTTODA nibutyag nga gipadad-an na og taga City Disaster Risk Reduction Office ang lugar aron dili paagian ang maong dapit.

Si Gullas sa iyang bahin  mimando nga dili paagian ang dapit ilabi kun ting-uwan kay risgo kaayo kini. Matud pa nga pangitaan pa sa siyudad og paagi nga luwas nga makatabok-tabok ang mga tawo sa maong dapit.

Nakahinabi na sab matud pa ni Edar ang mga magtutudlo sa elementarya nga kung adunay bagyo o dili maayo ang kahimtang sa panahon mag-modular class nalang sila aron luwas ang tanan.

Sa pikas bahin, tungod gihapon sa peligro dala aning pagsige og uwan, gidili lang una ang pag-agi sa dalan Manipis ug  sa Campo 4 kay magsige og kahunlak ang yuta ug pakatagak sa mga bato gikan sa ibabaw.

Ang bukirang barangay sa Talisay lutsanan kinj paingon sa Syudad sa Sugbo, Syudad sa Toledo sa lungsod sa Minglanilla. IBM BANAT NEWS