Top 5 Most Wanted nadakpan
CEBU, Philippines — Nadakpan sa kapulisan sa Tuburan Municipal Police Station ang Top 5 Most Wanted Person Regional Level sa Barangay Colonia, Lungsod sa Tuburan sa miaging adlaw.
Ang akusado mao si alyas Ondo, 37 anyos, residente ra sab sa maong lugar ug dunay 2-counts nga kasong rape ug sexual assault.
Si Judge Judilyn Hugo Tapia-Menchavez, Presiding Judge sa RTC Family Court, Branch 8, Toledo City ang nag-issue sa warrant of arrest batok sa akusado sa 2 counts sa kasong rape, ug 2 counts sa kasong sexual assault ubos sa Article 266-A sa Revised Penal Code, nga gi amendar sa Republic Act 8353 penetsahan Mayo 16, 2023.
Wala'y gitugot nga piyansa sa kasong 2 counts of rape samtang P120,000 ang girekomendar nga piyansa sa kasong sexual assault matag kaso.
Sa impormasyon sa kapulisan ang giingong pagpanglugos sa akusado nahitabo adto pang tuig 2023 diin ang biktima mao ang 16-anyos nga apo sa 60-anyos nga kapuyo niini.
Ang akusado nagtingkagol kini karon sa prisohan sa Tuburan Municipal Police Station. IBM BANAT NEWS
- Latest
